Қарағандылық дәрігерлер үш айлық баланың жүрегіне күрделі ота жасады
Қарағанды қаласының №2 Көпбейінді ауруханасы жанындағы балалар кардиохирургиясы бөлімшесінде үш айлық сәбидің жүрегіне ота жасалды. Қыз баланың толыққанды өмір сүруіне үміт бар.
Кішкентай Айлиннің ата-анасы сәбиінің күрделі диагнозы туралы ол туылғаннан кейін ғана білген. УДЗ кезінде қыздың туа біткен жүрек ауруы және қарыншалық септикалық ақауы бар екендігі анықталды. Қарапайым сөзбен айтқанда, нәрестенің жүрегінде екі сантиметрлік тесік болды. Соның салдарынан бала тұншығып, баяу салмақ жинаған.
– Біз Сәтбаев қаласында тұрамыз. Жүктілік қалыпты өтті. Сондықтан диагноз туралы білгенде, төбемізге найзағай түскендей болды, – дейді қыздың анасы Ләйлә. – Жүрегіндегі саңылау бала жас қосқан сайын бітеледі деп үміттендік. Алайда ота жасату керектігі белгілі болды. Бақытымызға орай, біз тәжірибелі дәрігерлердің бақылауына түстік. Бізге екі операция жасалды, қазір сәбиім жазылып келеді.
Алдымен Айлиннің өкпе артериясын тарылтып, түзетуге дайындады. Жақында оның жүрегіндегі ақауды жамап, екінші ота жасалды. Нәресте кардиология бөлімінде шамамен бір жыл бойы байқалады.
– Бүгін біз басқа үш айлық сәбиге тағы бір күрделі ота жасаймыз. Ол балада үлкен ашық артериялық каналы бар аортаның сыни коарктациясы бар. Дәрігерлер оның диагнозын кездейсоқ анықтады, – дейді балалар кардиохирургиясы бөлімінің меңгерушісі Жанат Болатбекұлы. – Ол облыстық балалар ауруханасына түсті. Анасының айтуынша, бала басынан жарақат алған. Тексеру кезінде диагноз қойылды. Мұндай операциялар әдетте республикалық клиникаларда жүргізіледі, бірақ біз де жүректің ауыр ақаулары бар пациенттерді емдеуде мол тәжірибе жинадық.
Қарағандының №2 Көпбейінді ауруханасы жанындағы балалар кардиохирургиясы бөлімшесі 25 төсекке шақталған. Мұнда өмірдің алғашқы күндерінен бастап 18 жасқа дейінгі балаларға күрделі операциялар жасалады. Ең алғашқысы 10 жыл бұрын жасалған. Осы уақыт ішінде бөлімшеде жүрекке 2 500-ға жуық ашық және мыңға жуық жабық оталар жасалды. Орталық дәрігерлері жылына 200-ден астам ота жасайды. Бөлім заманауи ультрадыбыстық құрылғылармен және барлық қажетті жабдықтармен жабдықталған.
