Бұқараға серпін берген жүздесу
Ұлытау ауылдық округінің әкімі Талғат ӘБЖАППАРОВТЫҢ жыл қорытындысы бойынша өткен тұрғындармен есепті кездесуі екіжақты ашық әңгіме алаңына айналып, бүкпесіз пікір алмасуға мол мүмкіндік берілді. Әдеттегідей, бұл жолы да ауыл әкімінің халық алдындағы жүздесуіне аудан әкімі Советбек МЕДЕБАЕВ арнайы қатысты.
Есепті кездесуде Талғат Мұсылманбекұлы жиналған қауымның алтын уақытын құрғақ есеппен зая етпеді. Баяндама алдын ала аудандық газетте жарияланғандықтан сөз басын бірден алдағы атқарылатын жұмыстарынан бастады.
Әкімнің айтуынша, ауыл инфрақұрылымын дамыту бағытында көшеаралық автокөлік, жаяу жүргінші жолдары, селоны жарықтандыру, абаттандыру жұмыстары биыл да жалғасын таппақ. Сонымен қатар, ауылдағы иесіз қалған қоқыстарды шығару және қатты тұрмыстық қалдықтарды жою жұмыстары күн тәртібінде тұр. Мүмкіндігі шектеулі балаларға арнап, ойын алаңын салу да жоспарда бар. Бұдан бөлек, Ембұлақ, Әулиетау маңынан саялайтын орын жасау, Асанқайғы ескерткішіне ағымдағы жөндеу жұмыстарын жүргізу ол да жоспарға енгізіліпті. Елді мекен тұрғындарын жұмыспен қамту, әлеуметтік-тұрмыстық жағдайларын көтеру, сондай-ақ шағын және орта кәсіпкерлікті дамыту ауыл әкімінің қолға алып жатқан мәселесінің бірі болып отыр. Дәл қазір арнайы жобалар әзірлену үстінде. Осыған қарағанда, осы жылы атқарылар жұмыстар ауқымды. Тізе берсек, ауыл әкімінің былтырғы жылы атқарған жұмыстары айтарлықтай. Селода оң өзгеріс те, нәтижелі іс те бар екені анық. Бұл жөнінде толық мәлімдемеуіміздің себебі өткен аптада ауыл әкімінің баяндамасы аудандық газетке жарияланғандықтан, оған қайта оралмауды жөн санадық.
Ал, біздің есепті кездесуден түйгеніміз, ауыл әкімінің жұмысында жүйе бар. Әрине, жүйе бар жерде нәтиже де болары сөзсіз. Бір байқағанымыз, Талғат Әбжаппаровтың сөзі мен ісінің арасында алшақтық жоқ. Баяндамасында да сылдыр сөз емес, нәтижелі істер байқалады. Есеп пен жоспар астарында үміт пен сенім бар. Осындай жақтары көпшіліктің үмітін оятып, сеніміне серпін берді.
Жалпы, кездесу еркін форматта өтті. Ауыл әкімі қойылған сауалдарға жалтармасыз, нақты жауап қайтарып отырды. Негізгі көтерілген мәселе жаз айларында бақташы болмағандықтан ауыл тұрғындарының малдары қараусыз жүретіндігі болды. Осының салдарынан көшедегі жасыл-желекті ірілі-ұсақ малдардың отап кететіні айтылды. Ардагер-ұстаз Шолпан Жалғабекова ауыл тұрғындарының мал жаятын жайылымы тарылғандығын айтып шағымданды. Ал, зейнеткер Жанкелді Әбдікәрімов қалтарыстағы көше жолдарының қардан тазаланбағанына қынжылды. Бұл сауалдарға өңір басшысы, ауыл әкімі жауап беріп, тұрғындар тілегі орындалатынына сендірді.
Қысқасы, есепті кездесу тұрғындардың өкпе-наз, наразылық дауына ұласқан жоқ. Ниеті түзу, қажетті сұрақтар қойылды. Екі тарапта бүкпесіз ашық әңгіме өрбітумен болды. Кездесу соңы түсіністікпен, ымыра-бірлікпен аяқталды.
