Ауылдың рухы жаңғырып, келбеті көркейе түсті

Тамыз айы Алғабас ауылының жұртшылығы үшін есте қаларлық ерекше күндердің бірі болды. Бір күнде қатарынан үш бірдей әлеуметтік әрі рухани маңызы зор нысан – “Батырлар мемориалдық алаңы”, “Ауыл атауы” және “Балалар ойын алаңының” ашылуы өтті. Бұл – елді мекеннің даму қарқынының, ауыл тұрғындарының белсенділігі мен бірлігі арқасында жеткен үлкен жетістік.

Салтанатты іс-шараға арнайы келген Ұлытау ауданының әкімі мен округтегі мекеме басшылары ауыл тұрғындарымен бірге қуанышқа ортақтасты. Олар атқарылған істерге оң бағасын беріп, болашақта да ауыл тіршілігінің жандануына қолдау болатынын жеткізді.

БАТЫРЛАР РУХЫНА
ТАҒЗЫМ

Жаңа ашылған “Батырлар мемориалдық алаңы” – Тәуелсіздік үшін күрескен ардагерлер мен ел қорғаған ерлерге көрсетілген тағзымның көрінісі. Бұл алаң – жас ұрпаққа отансүйгіштік пен елге деген құрметті насихаттайтын тәрбиелік мәні зор нысан. Ауыл азаматтарының ұсынысымен қолға алынған бұл жоба – көпшіліктің қолдауымен жүзеге асты.

АУЫЛ АТАУЫ –
БОЛАШАҚҚА БАҒЫТ

Алғабас атауы – ел тарихынан, ұлт болмысынан сыр шертетін қастерлі сөз. Ауыл кіреберісіне қойылған “Ауыл атауы” аркасы – тек белгі емес, бұл – ауылға деген құрметтің белгісі, рухани тұғыр. Бұл нысан ауылдың көркіне көрік қосып, сырттан келген қонаққа айбынды әсер қалдырады.

БАЛАЛАРҒА – БАЗАРЛЫҚ

“Балалар ойын алаңының” ашылуы – ең қуанышты сәттердің бірі болды. Заманауи үлгіде жабдықталған бұл орын – ауыл балаларының бос уақытын тиімді өткізуіне, спортпен айналысуына, денсаулығын нығай- туына мол мүмкіндік береді. Бұл – жас буынға жасалған үлкен қамқорлық.

ЕЛ АЛҒЫСЫ –
ШЫНАЙЫ БАҒАСЫ

Іс-шара барысында ауылдың Құрметті азаматы, ардагер ұстаз Үміш Алтынбекова жүрекжарды тілегін арнап, “Бүгінгі ашылған игі нысандар – ертеңгі ел болашағы үшін жасалған қадам. Ауылымыз гүлдене берсін!” – деп, ақ батасын берді.

Лента қию рәсімі Қауымдастық төрағасы Бауыржан Браяқовқа және Ардагерлер кеңесінің төрағасы Байғали Аширбековке табысталды. Бұл – ауыл ақсақалдарына деген құрметтің айқын белгісі болды.

ТҮЙІН

Қорытындылай келе, бұл үш нысанның ашылуы – тек физикалық құрылыс емес, бұл – ауылдың рухани жаңғыруы, тұрғындардың ортақ мүдде төңірегінде бірігуінің нәтижесі. Осындай игі бастамалар Алғабастың келешегіне сенім ұялатып, жас ұрпаққа үлгі болары сөзсіз.

Ізтай БЕЛГІБАЙҰЛЫ.