Жаңа спорт алаңы – салауатты ұрпаққа бастар жол

Ұлытау ауданының орталығында көптен күткен қуанышты оқиға – балаларға арналған көпбейінді спорттық ойын алаңы ашылды. Бұл – денсаулықты нығайтуға, бұқаралық спортты дамытуға және жас ұрпақтың бос уақытын тиімді ұйымдастыруға бағытталған маңызды қадам.

Салтанатты ашылу рәсіміне Ұлытау ауданының әкімі Аманжол Мырзабеков, аудандық мәслихаттың төрағасы Ахат Құрмансейітов, ауыл ақсақалдары мен мекеме, бөлім басшылары қатысты. Жиналған көпшілік бұл бастаманың маңызын ерекше атап өтіп, ауыл жастары үшін жасалып жатқан мүмкіндіктерге ризашылықтарын білдірді.

Үш бірдей спорт түріне арналған алаң

Жаңа спорттық нысан өз ішіне баскетбол, волейбол және үлкен теннис алаңдарын біріктіріп отыр. Бұл алаңдар заманауи талаптарға сай жабдықталған, қауіпсіздік шаралары ескерілген. Енді ауыл балалары тек мектеп сабақтарында ғана емес, бос уақыттарында да кәсіби деңгейде спортпен айналысуға мүмкіндік алады.
Жаңа алаң – ауыл жастары үшін дене тәрбиесімен айналысудың қолжетімді әрі ыңғайлы ортасы ғана емес, болашақ чемпиондардың алғашқы дайындық алаңы болары анық.

Салауатты ұрпақ – жарқын болашақ

Аудан әкімі Аманжол Мырзабеков өз сөзінде салауатты өмір салтын ұстанатын ұрпақ – ел болашағының кепілі екенін атап айтты.
– Бұл спорт алаңы – жай ғана құрылыс емес, бұл – ел ертеңіне салынған инвестиция. Мұнда ауыл жастары шынығып, биік белестерді бағындыруға жол ашылады, – деп атап өтті.
Ашылу салтанатында сөз сөйлеген ауыл ақсақалдары мен ардагер ұстаздар жас буынды спортқа, тәртіпке, табандылыққа тәрбиелеудің маңызын атап, елді ортақ іске жұмылуға шақырды.

Болашақ чемпиондар осында өседі

Жаңа алаңның ашылуы – ауыл балалары үшін үлкен серпіліс. Енді олар кәсіби жаттықтыру мүмкіндігіне ие бола отырып, облыстық, республикалық жарыстарға дайындалып, ел намысын қорғауға жол аша алады.
Ата-аналар да қуанышты. Балалардың телефон мен гаджетке телмірмей, таза ауада, спортпен шұғылданып өсуі – әрбір жанұяның арманы. Ұлытау ауданының орталығында ашылған бұл көпбейінді спорт алаңы – бұқаралық спортты дамыту мен жас ұрпақтың жан-жақты қалыптасуына бағытталған маңызды қадам. Осындай нақты істер арқылы салауатты қоғам қалыптасып, ауылдың келешегі нықтала түсері сөзсіз.

Ізтай БЕЛГІБАЙҰЛЫ.