Түйткілді мәселелер қозғалды

Аманкелді ауылдық округінің әкімі Ноян ЖЕҢСІКБАЕВ тұрғындар алдында есеп берді. Кездесуде ауыл әкімі былтырғы жылы атқарылған жұмыстарына тоқталды. «Халықтың бюджетке қатысуы» пилоттық жобасы арқылы «Орталық» паркке көп функционалды 3 дана балалар ойын алаңы орнатылғанын айтты. Келешекте саябаққа «Воркаут» дене шынықтыру алаңын орнатуда жоспарда бар екен. Әсіресе, көктемгі және күзгі тазалық жұмыстары тиянақты жүргізіліпті. Ауыл тұрғындарының көмегімен саябақтағы қураған ағаштар сыртқа шығарылып, ағаштардың түптері әктелінген. Ауылдың көшелері мен ауылға кіреберіс жерлер қоқыстан түгелдей тазартылған. Бұған Қуандық САҒЫМБАЕВ пен Балғабек ҚАРАЖОРҒИННЫҢ қолдау көрсетіп, ел азаматы ретінде қолұшын бергенін ауыл әкімі атап өтті.

Бір айта кетерлігі, бұл ауылда нәтижелі жұмыспен қамту және жаппай кәсіпкерлікті дамыту бағдарламасы аясында іске асқан жұмыстар айтарлықтай. Мемлекеттік грантқа округтің 2 тұрғыны ие болған.

Ал, ауылшаруашылық саласы бойынша Қазақстан Республикасында агроөнеркәсіп кешенін дамытудың 2017-2021 жылдарға арналған мемлекеттік бағдарламасын жүзеге асыруға ауданның әлеуметтік-экономикасын дамытудың 2020-2025 жылдарға арналған кешенді жоспары негізінде бірқатар жұмыстар атқарылыпты. Ауылға мал тұқымын асылдандыру, түрлендіру мақсатында 4 шаруа қожалық иелері 22 бас асыл тұқымды әулиекөл, ақбас бұқаларын әкеліп, 570 бас аналық сиыр малына қосу арқылы соңғы 3 жылда мал басын түрлендіру жұмыстарын ілгерілетуде. Осы бағытта өткен жылы «Қаражорғин Б» және «Қорғантас» шаруа қожалықтары 9 бас әулиекөл асыл тұқымды бұқаларын сатып алыпты. Ал, «Қаражорғин Б» шаруа қожалығы 12 млн. 700 мың теңгеге погрузчик-П тракторын лизингке сатып алып, ауыл халқының сұранысына сәйкес көмек беруде. Бұдан бөлек, «Кәусар» жеке кәсіпкері 495000 теңгеге квадрокоптер-ДЛ маркалы /Дрон/ сатып алып отыр.

Білім саласына келер болсақ, мектепте 59 оқушы, 22 мұғалім бар. Мектеп ғимараты былтырғы жылы күрделі жөндеуден өткен. Ауылда бұқаралық спорттың дамуы да ел көңілінен шығатындай. Ауданда өткен турнирлерде ауылдың ересектері мен жасөспірімдері жеңімпаз атанып, 1 және 3 орындарға иеленген. Сонымен қатар мектеп оқушысы Арнат Жездібекұлы «Үздік жас спортшы-2021» номинациясын иеленіпті.

Баяндамада ауыл әкімі сапалы ауызсумен қамтамасыз ету, көшелерді жарықтандыру, абаттандыру және көгалдандыру, автомобиль жолын күтіп ұстау, қоқыс төгетін полигонының жер телімін ауыстыру сияқты бірқатар жұмыстар алдағы күннің еншісінде екендігін айтып өтті.

Бұдан кейін кездесу соңында тұрғындар арасынан ауыл әкіміне өткір сауал айтушылар да кездесті. Бұл кездесуде тұрғындар өздерін алаңдатып отырған көптеген мәселелерді қозғады. Қанат Байсалбеков қоқыс төгетін полигонмен жол, көше жарығын сынға алды. Рақым Әжібаев «Кененбай» тоғаны мен ауызсу мұнарасы жайында ауқымды мәселелерді сөз етті. Сырымбет Амантаев жер алуға байланысты өз өтінішін білдірді. Осы тұста, ауыл халқы екіге жарылды. Бірқатары ауыл әкімінің жұмысына «қанағаттанарлық» деп баға берсе, екінші бөлігі ауыл әкімінің жұмысын сынға алды.

Жиын түйінінде аудан әкімі тұрғындар қозғаған мәселені ауыл әкімі есебі аяқталған соң нақтылайтынын жеткізді.

Жасұлан АЯШЕВ