Жыл қорытындысы – нәтижелі

Жуырда Ұлытау аудандық соты төрағасының міндетін атқарушы Сәрсен САҒАТОВ өткен жылдың жұмыс қорытындылары бойынша баспасөз мәслихатын өткізді. Есепті кезеңдегі қызмет ауқымының нәтижелерін түйіндеген жиынға Сәтбаев қалалық «Ақшам» телеарнасы мен аудандық «Ұлытау» газетінің журналистері қатысты.

Журналистер қауымымен жүздесу барысында Сәрсен Сейткенұлы Мемлекет басшысы тарапынан сот жүйесіне қойылып отырған талаптарға сәйкес, міндеттелген тапсырмалар аясында көбірек әңгімеледі. Аталған жұмыстардың тиімділігі мен шынайы нәтижелері жайлы деректерді тілге тиек етті. Бұдан кейін былтырғы жылы қаралған істердің мәліметіне сүйеніп, мазмұнды шолу жасады. Сонымен қоса, алдағы күндері атқарылатын істердің де қыр-сырын ашып берді. Осыған қарап-ақ, аудандық соттың қызметіндегі тиянақты көрсеткіштерін ресми деректерінен айқын бағамдауға болады. Мәселен, 2020 жылы азаматтық істердің саны 97-ге жеткен. Оның ішінде, 19 іс медиация тәртібінде қаралып, бітімгершілік жолымен татуластырылған. Бұдан бөлек, 73 іс өндірісте қаралып, қанағаттандырылған. Мұның сыртында, 4 іс кейінге шегеріліп отыр.

Бір байқағанымыз, іс жүргізу барысында негізсіз қайтарылған немесе мүлдем қараусыз қалдырылған арыздар жоқ. Ал, әкімшілік құқық бұзушылық туралы 96 іс тіркелген. Оның 30-ға жуығы қысқартылып, 24 іс бойынша айыппұл салынған. Көлік басқару құқығынан 2 тұлғаны айырып, 2 адамға әкімшілік іс бойынша ескерту жасалынған. Осы әкімшілік іс негізінде қамауға алынғандар да бар. Қазақстан Республикасының аумағынан шығару жазалары да қолданылған. Нақты айтқанда, өткен жылы 93 әкімшілік іс қаралып, нүктесі қойылған. Бұл қаралған істер төңірегінде сот процестерін жүргізу, ұйымдастыру мәселелеріне қатысты ешқандай арызшағым жоқ. Судьялардың істерді қарау сапасы қалыпты деңгейде. Соған қарағанда, сот процестерін ұйымдастыру тәртібі өз мәнінде жүргізілген сыңайлы. Әсіресе, қаралған істердің басым бөлігі мемлекеттік тілде жүргізіліп отырған.

Баспасөз мәслихатында жұмыстың сұрақ-жауап тәсілімен өрбуіне де мүмкіндік берілді. Өз кезегінде Сәрсен Сейткенұлы журналистер тарапынан қойылған сауалдарға нақты әрі тұщымды жауап қайырды. Қойылған сұрақтардың көбісі сот жүйесіне қатысты болды.

Қысқаша түйіндегенде, Ұлытау аудандық соты 2 құрамды, жалпы юристдикция бойынша қылмыстық, азаматтық, әкімшілік-құқық бұзушылық туралы істерді қарайды. Осы бағытта аудандық сот ашықтық пен жариялық қағидасын берік ұстанған. Сот актілерінің барлығы электрондық цифрлық қолтаңбамен 100% расталған. «Сот кабинеті» заман талабына сай жабдықталған. Аудио-бейнежазба қондырғылары орнатылған. Яғни, сотқа қатысушылар сот процесін бейнежазба арқылы көре алады, әрі қажеттілік туындаған жағдайда жазбаның көшірмесін түсіре алады. Осындай заманауи технологиялардың енгізілуі мен қолданылуы сот жұмысын жеңілдетіп қана қоймай, сот қызметінің ашықтығы мен жариялылығын қамтамасыз етуге мүмкіндік беріп отыр.

Қайрат ЖҰМАБАЙ