Жаңа белгі стелласы орнатылды
Ұлытау және Қостанай облыстарының шекарасында ерекше сәулеттік нысан – жаңа белгі стелласы бой көтерді. Бұл нысан өңірлер арасындағы шекараны айқындап қана қоймай, ұлттық нақыштағы көркем өрнектері арқылы қонақтарды қазақы қонақжайлылық пен мәдени мұра рухымен қарсы алады.
Жоба сәулеттік және инженерлік талаптарды толық сақтай отырып жүзеге асырылды. Стелланың жалпы ұзындығы – 8 метр, ал үстіндегі “ULYTAU” жазуының биіктігі – 1,5 метр, қалыңдығы – 40 сантиметр. Негізгі постаментінің биіктігі – 1,5 метр, ені – 1 метр. Фундаменті 800 мм тереңдікте орналасып, М400 маркасынан төмен емес арматураланған бетоннан құйылды.
Постамент темірбетон қаңқасынан тұрғызылып, қасбеттік керамогранитпен қапталған. Қара мәрмәр түстес беткі қабаты асқақтық пен сән береді. Қазақы ою-өрнек айна және алтын түстес жылтыратылған тот баспайтын болаттан жасалып, композицияға ұлттық колорит сыйлайды.
Стелла тек сәулет өнерінің туындысы ғана емес, өңірлер арасындағы бірлік пен ынтымақтың символы ретінде де мәнге ие. Бұл нысан арқылы жолаушылар Ұлытау жеріне аяқ басқан сәттен-ақ оның тарихи тереңдігі мен мәдени болмысын сезінеді.
Ұлытау облысының сәулет және қала құрылысы бөлімінің мамандарының айтуынша, мұндай белгілер аймақ имиджін қалыптастыруда маңызды рөл атқарады. Стелла елді мекендер мен өңірлердің мәртебесін көтеріп, туристік тартымдылығын арттырады.
Ұлытау – Қазақстан тарихының алтын қазығы саналады. Сондықтан облыс шекарасында орнатылған әрбір нышан өңірдің өзіндік келбетін айшықтап, оның рухани мәнін келер ұрпаққа жеткізуге қызмет етеді.
Ізтай БЕЛГІБАЙҰЛЫ.
