Жұмысшы мамандықтарының қадірі – уақыт сынынан өткен құндылық

Бүгінгі қоғамда жаңа технология, цифрландыру, жасанды интеллект сынды ұғымдар жиі айтылады. Алайда қай дәуір болмасын елдің нақты дамуын қамтамасыз ететін басты күш – еңбек адамы. Әсіресе жұмысшы мамандықтарының қоғамдағы орны жыл өткен сайын айқындала түсуде.

Қарапайым ғана мысал: құрылысшысыз – үй салынбайды, дәнекерлеушісіз – өндіріс жүрмейді, механизаторсыз – егін орылмайды. Демек, экономиканың нақты секторы жұмысшы кадрсыз өмір сүре алмайды. Бұл – уақыттың өзі дәлелдеген шындық.

Соңғы жылдары еңбек нарығында техникалық салаға бейім мамандарға сұраныс тұрақты түрде өсіп келеді. Электр энергетикасы, көлік-логистика, ауыл шаруашылығы, жол құрылысы секілді бағыттарда білікті жұмысшы қолына зәрулік байқалады. Тіпті дамыған елдердің өзінде инженерлік-техникалық және жұмысшы кәсіптерге жоғары жалақы мен әлеуметтік қолдау қарастырылуда.

Қазақстан үшін де бұл тақырып өте өзекті. Өйткені біз индустриялық-инновациялық даму бағытын ұстанып келеміз. Ал өндірісті өркендетудің басты шарты – кәсіби білімі мен тәжірибесі бар жұмысшы кадрдың жеткілікті болуы. Сондықтан қазіргі таңда колледждер мен оқу орындарында дуалды білім беру жүйесін енгізу, кәсіптік бағдар беруді күшейту аса маңызды.

Жұмысшы мамандығы тек «қол еңбегі» деген тар ұғымға сыймайды. Ол – жауапкершілік пен кәсібилікті талап ететін, қоғам игілігіне қызмет ететін салмақты іс. Әрі бұл мамандықтардың болашағы зор. Жас ұрпақ арасында «кәсіп игеру – табыстың кепілі» деген түсінікті қалыптастыру уақыт талабы болып отыр.

Бақытжан ЖАНАБАЕВА,
Шеңбер ауылдық округінің тұрғыны.