Жұмысшы мамандықтар жылы – еңбек адамының мәртебесін көтеретін кезең

Қазақстанда 2025 жыл «Жұмысшы мамандықтар жылы» деп жарияланды. Бұл бастаманың мәні зор, себебі елдің әлеуметтік-экономикалық дамуы тікелей еңбек адамының қолынан жасалатын нақты жұмысқа байланысты. Өндіріс пен құрылыс, ауыл шаруашылығы мен энергетика, көлік пен қызмет көрсету салаларында мыңдаған білікті мамансыз даму мүмкін емес.

Қазіргі таңда қоғамда жұмысшы мамандықтарының маңызы артып келеді. Мәселен, құрылысшысыз жаңа үйлер бой көтермейді, дәнекерлеуші болмаса зауыттардағы өндіріс тоқтап қалады, ал механизаторларсыз ауыл шаруашылығының өркендеуі екіталай. Яғни, қарапайым еңбек адамынсыз қоғамдағы бірде-бір сала алға жылжымайды.

Сондықтан мемлекет бұл жылды арнайы атап өту арқылы жастардың техникалық және кәсіптік білімге қызығушылығын арттыруды, жұмысшы кадрлардың мәртебесін көтеруді мақсат етіп отыр.

Жастар үшін жаңа мүмкіндік

Жұмысшы мамандықтар жылы ең алдымен жастарға бағытталған. Өйткені кәсіби-техникалық оқу орындарында сапалы білім алып шыққан түлектер еңбек нарығында үлкен сұранысқа ие болады. Бұл – жастардың тұрақты жұмыспен қамтылып, өз елінде болашағын құруына жол ашады. Сонымен бірге, бұл қадам жұмыссыздық деңгейін төмендетіп, отандық өндірістің өркендеуіне ықпал етпек.

Қоғамдық көзқарас өзгеруі тиіс

Өкінішке қарай, кейде жұмысшы мамандықтарына деген қоғамдағы көзқарас төмен болып жатады. Ал шын мәнінде, ең қажетті, ең қадірлі кәсіп иелері – қарапайым жұмысшылар. Олардың еңбегі арқылы үйлер тұрғызылады, жолдар салынады, зауыттар жұмыс істейді. Сондықтан Жұмысшы мамандықтар жылы – осы мамандық иелерінің беделін қоғам алдында көтеріп, еңбек адамына құрмет көрсетуге үлкен мүмкіндік

Нұргүл БАЙҚОНЫСОВА,
Қарсақбай кентінің тұрғыны.