Жұмыс сараланып, жоспар нақтыланды
Жезді кентінің әкімі Серік ЕСЕНҒАЛИЕВТІҢ бір жылда атқарған жұмыс қорытындысы бойынша тұрғындар алдындағы есеп беру кездесуіне аудан әкімінің орынбасары Нұржан ОРЫНБАЕВ, тиісті аудандық мекемелер мен салалық бөлімдердің басшылары, БАҚ өкілдері қатысты. Маңызды жиын карантиндік шектеу шараларын қатаң сақтау жағдайында өткізілді.
Ашып айту керек, кентте тиянақты атқарылған істер баршылық. Өткен жылы «Ауыл – ел бесігі» бағдарламасы аясында жүргізілген жұмыстардың нәтижесі жергілікті тұрғындар көңілі кәдімгідей марқайды. Нақтылай түссек, мәдени-сауық орталығы, мектеп-интернат ғимараты күрделі жөндеуден өтіп, көше жолдарына асфальт төселді. Биылғы жылы бұл жұмыс толықтай аяқталады деп күтілуде. Бұрынғы мектеп-интернаттың жатақханасы күрделі жөндеуден өткізіліп, Балалар өнер мектебі мен Оқушылар үйіне берілді. Соның негізінде жаңадан 18 тұрақты жұмыс орыны ашылды. Филиалда 14 үйірме жұмыс істейді, оларға 200 оқушы тартылған. «Жұмыспен қамтудың жол картасы — 2020» бағдарламасы шеңберінде №6 орта мектеп ауласындағы шағын футбол алаңы пайдалануға берілді. Кентте футболмен шұғылданушылар ұатары артып, жақсы дамып келеді.
Аудан әкімінің жас кәсіпкерлерді қолдау мақсатындағы қайтарымсыз грантынан кент жастары құралақан емес. Гүлнар Жаналинова наубайхана, Бекзат Асқар жылыжай кешенін, Айтолқын Рысбек кеңсе дүкенін ашып отыр. №6 орта мектебі де күрделі жөндеуден өткен. «Beeline», «Kcell», «Aсtiv» байланыс операторларының қызметі – мінсіз. Үйлерге интернет желісі тартылған. Қазір жаңа спорт кешені бой көтеріп келеді. Аурухана ғимаратына күрделі жөндеу жұмыстары жүргізілмекші. Бұл – тұрғындар көтерген басты мәселердің бірі.
Кездесуде тұрғындар ток мәселесін түбегейлі шешіп беруді сұрады.
Кент әкімі әлеуметтік желі арқылы түскен сауалдардың бәріне тұщымды жауап берді.
Жиын түйінінде аудан әкімінің орынбасары Нұржан Орынбаев ток қуатын заңсыз пайдаланып отырғандарға қатысты ұтымды шара қолдануды тапсырды. Ол сондай-ақ, кент әкіміне өзге де күрделі мәселелер тізімін шұғыл ұсынуды міндеттеді.
Жасұлан АЯШЕВ
ЖЕЗДІ кенті.
