Өз кәсібінің білгірі

Президент тапсырмасымен бекітілген «Жұмысшы мамандықтары жылы» аясында өзі қалаған мамандық бойынша адал еңбек етіп, еліміздің өсіп-өркендеуіне үлес қосып жүрген мамандар баршылық. Бүгінгі кейіпкеріміз – «Қазақтелеком» акционерлік қоғамының Ұлытау ауданы орталығындағы өндірістік торабында кабель зақымдануларын жою және кабель желілерін жөндеуді қамтамасыз ететін электржөндеушісінің бірі – Нұртай Бейсенбаев. Ол телефон жүйесін бес саусақтай білетін кәнігі маман. Еңбек өтілі – 12 жыл.

Қазір Нұртай Нұрсанұлы заман талабына сай жұмыстарын оңтайландырып, заманауи үлгіде жұмыс істеуге көшкен. Жаңа жүйені меңгеріп алғанына да біраз уақыт болды. Оған «Қазақтелеком» компаниясы тарапынан жүктелер міндет те аз емес. Күнделікті тұрақты телефон, интернет желісімен мегалайн, алтел, «Бизнеске арналған
wifi». Altel және tele екі операторларымен бірлескен ұялы байланыс бойынша қызмет көрсету IDTV интерактиві сандық жоғары жылдамдықты қосымша қызметтер бар. Осының бәрін пайдаланып отырған мекемелер мен тұрғын үйдегі қолданушыларға қызмет көрсету – Нұртайдың мойнында. Оның таңертеңнен кешке дейін дамыл таппай жүретіні сондықтан. Қашан көрсең де асығыс-үсігіс жүргені. Тіпті, кейде демалыс күндері де демалмай, жұмыс басты болып қалады. Бұған ол үйренген. Уақытпен санаспайды. Ұзақ күн бойы тынымсыз еңбек етуге төселген. Кез-келген уақытта телефон жүйесінде ақау болып жатса, дереу қалпына келтіруге тырысады. Күнделікті жұмысы осылай жалғаса береді. Оның қолы бос, жайбарақат жүретін күндері сирек. Осыған қарап-ақ, Нұртайдың жұмысында тыным жоқ екенін бағамдай беруге болады. Бұл қалыпты жағдай. Жайшылықта сырт көзге жеңіл-желпі жұмыс сияқты болып көрінгенімен, оның жұмысы аса жауапкершілікті талап ететін сала.
Қарап отырсақ, Ұлытаудағы «Қазтелеком» жүйесінің өз деңгейінде жұмыс істеп тұрғаны Нұртайдың арқасы. Әйтпесе, бұл салаға екінің бірі шыдай алмас еді. Табандылықты қажет ететін кәсіп – бұл. Осы телефон жүйесінің кідіріссіз жұмыс істеп тұруы – Нұртайдың еңбегі. Бұл оның жұмысты тиянақты атқарғанының нәтижесі.
Шын мәнінде Нұртай Нұрсанұлы өз кәсібін ұршықша иірген кәсіби маман. Өз мамандығын білгірі десек, ол – артық айтқандық емес. Бұл – мақтау оған лайықты берілген баға. Себебі, ол қазіргі дамыған заманда телефон жүйесіндегі технологияларды әп-сәтте меңгеріп алған азамат. Ақпараттық технология қарыштап алға озған кезеңде коммуникация қызметінің де заман көшінен бір қадам алға жүруі – заман талабы. Соны білгендіктен Нұртайда әрдайым ізденіп, жаңашылдыққа ұмтылуда. Осындай өз кәсібін жанындай сүйетін маманның арқасында аудандағы ғаламтор, телефон жүйесі талапқа сай даму үстінде. Бұл – оның өз ісіне адалдығы, кәсіпке деген жауапкершілігі заман талабына сәйкес, ұмтылыстың жарқын үлгісі.

Қайрат ЖҰМАБАЙ.