Ынтымақтастықтың ұтымды тұстары көп
Бүгін Ұлытау облысының әкімі Дастан Рыспеков «ПетроҚазақстан Құмкөл Ресорсиз» компаниясының президенті Ян Миньюймен кездесті. Тараптар өңір мен компания арасындағы әріптестікті дамыту мәселелерін талқылады.
Кездесу барысында облыс әкімі өңірге әлеуметтік нысандардың қажеттілік мәселесін көтеріп, компаниядан қолдау білдіруді сұрады. Өз кезегінде Ян Миньюй бұл ұсынысқа түсіністікпен қарап, эмиссия төлемдерін жүзеге асыру, әкімдік ұсынған әлеуметтік нысандарды қарастырып жақын арада ұсыныс енгізетінін жеткізді.
Сонымен қатар, Қызылорда облысының экологиялық тіркеуінде жұмыс істейтін екі компанияның біздің өңірге қайта тіркегендігі мәлім болды. Жыл соңына дейін қалған төрт компанияның экологиялық рұқсаттамаларын тіркеу бойынша жұмыстар жалғасатын болады.
Компания Президентінің мәлімдеуінше, Ұлытау облысына өтелетін қаражат сомасы осы жылы 30-40 миллион теңге болса, келесі жылы 100 миллионға дейін өсуі ықтимал.
Кездесу қорытындысында тараптар екіжақты ынтымақтастықты одан әрі дамытуға мүдделі екендіктерін білдірді.
