Ынтымақтастық нығаяды
Ұлытау облысының әкімі Дастан РЫСПЕКОВ «ПетроҚазақстан Құмкөл Ресорсиз» компаниясының президенті Ян МИНЬЮЙМЕН кездесті. Басқосуда өңір мен компания арасындағы өзара әріптестікті дамыту, әлеуметтік жауапкершілік және экологиялық мәселелер талқыланды.
Әкім өңірде әлеуметтік нысандарға деген қажеттілік өзекті екенін атап өтіп, компаниядан бұл бағытта қолдау көрсетуді сұрады. Ол әлеуметтік салаға инвестиция тарту – тұрғындардың өмір сапасын жақсартудың маңызды тетігі екенін жеткізді.
Өз кезегінде Ян Миньюй ұсынысты түсіністікпен қабылдап, компания эмиссия төлемдерін орындау және облыс әкімдігі ұсынған әлеуметтік нысандар тізімін қарап, жақын арада нақты ұсыныстар енгізетінін айтты.
Кездесуде сондай-ақ экологиялық тіркеу мәселелері сөз болды. Бұған дейін Қызылорда облысының экологиялық реестрінде жұмыс істеп келген екі компания биыл Ұлытау облысына қайта тіркелді. Жыл соңына дейін тағы төрт компанияны экологиялық рұқсаттамаларымен бірге өңірге тіркеу жұмыстары жалғасады.
Компания басшысының айтуынша, биыл Ұлытау облысына өтелетін қаражат көлемі 30–40 миллион теңге шамасында болса, келесі жылы бұл сома 100 миллион теңгеге дейін артуы мүмкін. Бұл қаражат өңірдің әлеуметтік және экологиялық жобаларын қаржыландыруға бағытталмақ.
Кездесу соңында тараптар екіжақты ынтымақтастықты нығайтуға және алдағы уақытта бірлескен жобаларды жүзеге асыруға мүдделі екендіктерін растады.
Ізтай БЕЛГІБАЙҰЛЫ.
