Велосаяхатшы Ұлытауда болды

Жақында ақтөбелік 71 жастағы велошабандоз Жұмабай Отарғалиев ұлт ұясы – Ұлытауға келді.

Қазақстанды велосипедпен аралап жүрген саяхатшы теміржол саласының ардагері. Бұл жолы ол сапарын Ұлы ақын Абай Құнанбаевтың 180 жылдығы мен Қазақстан Ассамблеясының 30 жылдығына арнапты. Ұзақ жолға саяхатшы велосипедпен 30 маусымда Ақтөбе қаласынан шыққан. Велошеру аясында Астана, Қарағанды, Жаңаарқа, Жезқазған өңірлеріне аялдап, Ұлытау ауданына атбасын бұрыпты.
Елге танымал велосаяхатшыны Ұлытау ауданы әкімінің орынбасары Алмат Сакипов, аудандық ардагерлер кеңесінің төрағасы Серік Ташенов салтанатты жағдайда қарсы алып, елге лайықты құрмет көрсетті. Аудандық мәдениет үйінің өнерпаздары жолсоқты болып шаршаған саяхатшының көңілін әсем әнмен сергітіп, қазақы дәстүрмен ұлттық дәмдерін ұсынды.
Бұдан кейін аудан әкімінің орынбасары бастаған топ Жұмабай Отарғалиевқа ауданның өлкетану музейін аралатып, өлке тарихына қанықтырды. Кездесу барысында саяхатшы сапарының мақсаты жайлы әңгімеледі. Велошабандоздың мақсаты – Ұлы Абайдың 10 тамызда өтетін 180 жылдық тойына дейін Семейге жету екен. Әрі Қазақстан халқына салауатты өмір салтын ұстануға үндеу тастап отыр.
Қасиетті өлкеде шамалы тыныққаннан кейін велосаяхатшыны ұлытаулықтар сәт-сапар тілеп, Жезқазған бағытына шығарып салды.

Қайрат ЖҰМАБАЙ.