Тасбұлақ – Тәңір сыйы
Жақында «Қазақмыс» корпорациясының демеушілігімен «Тасбұлақ» аумағы абаттандырылып, ел игілігіне берілді. Аталған аумақ – Мемлекет басшысының тапсырмасына сәйкес, туристік инфрақұрылымды дамыту мақсатында «Қазақмыс» корпорациясының көмегімен іске асып отыр.
Тасбұлақ аумағына абаттандыру жұмыстарын жергілікті мердігер Алмат Бегаев жүргізді. Мердігердің айтуынша, демалыс орнының аумағы 600 метрді құрайды екен. Бұлақ маңына тротуарлар төселіп, айналасы көгалдандырылған. Сонымен қатар, жарықтандыру желісі тартылып, сәулетті нысандар орнатылған. Демалатын орындар мен автокөлік тұрақтары жасалынған. Алаңның қақ ортасына Ұлытау тарихын айқындайтын белгітас қойылған. Әсіресе, туристер үшін табиғат аясындағы ғажайып орын болып тұр. Мұны Ұлытау өңіріндегі туризм саласын дамытуға, тұрғындардың өмір сүру сапасын арттыруға негізделген жоба деп айтуға болады.
Елге қуаныш сыйлаған «Тасбұлақ» алаңының ашылуына Ұлытау облысы әкімінің орынбасары Жәнібек Нөпіров қатысып, нысанның маңыздылығына тоқталды.
– Бүгін ұлытаулықтар үшін ерекше күн. Тағы бір маңызды жоба ел игілігіне беріліп жатыр. Мемлекет басшысы Қасым-Жомарт Тоқаев туризм саласын дамытуға ерекше көңіл бөлуді тапсырды. Бүгінгі күні Ұлытауды туристік мекенге, демалыс аймағына және Ұлы бабаларға тағзым ететін орталыққа айналдыру – біздің мақсатымыз. Былтыр Ұлытауда – Рәміздер алаңы ашылса, биыл «Тасбұлақ» алаңы абаттандырылды. Осы «Тасбұлақ» жобасына демеушілік жасаған «Қазақмыс» корпорациясына үлкен алғысымызды айтамыз. Ал, жұмыстың аманатын арқалап, Тасбұлақ айналасын абаттандырған өздеріңіздің жерлестеріңіз Алмат Бегаевқа ел атынан ерекше рақметімді айтамын. Бұл жобаның іске асуына облыс әкімі Дастан Адайұлы да үлес қосып, осы тапсырманың орындалысын қолға алған болатын. Бүгін міне, сол жоба іске асып отыр.
Жалпы айтқанда, бұлақ аумағының абаттандырылуы ел игілігі үшін жасалған жаңа жобаның бірі. «Бұлақ көрсең, көзін аш» деп атам қазақ бекер айтпаған. Су – тіршілік көзі. Бұлақ басына су алуға келген әрбір адам игілікті іске рақметін айтуға тиіс. Әр айтылған «алғыс» сауапқа жазылады деп ойлаймын.
Жыл басынан бері туризм саласын дамытуға 600 миллионнан астам қаржы бөлінді. Осы қарастырылған қаржы аясында облысымызда үш қонақ үй іске қосылмақшы. Ал келесі жылы Алтын Орданың 750 жылдығына байланысты аймағымызда республикалық деңгейде үлкен конференция өтеді. Сол кезде сыртқары елдерден келетін қонақтарға осындай көрнекті орындарды көрсететін боламыз. Әлі де жоспарда бірнеше ауқымды жобалар бар. Келесі кезекте «Күміс бұлақ» аумағы абаттандырылады. Сол сияқты, Едіге тау шатқалына шығатын жаяу жүргіншілер жолында туристерге ыңғайлы етіп жасау жоспарда бар. Ал, бүгінгі Тасбұлақ аудан тұрғындары мен қонақтарына табиғат аясында тыныстайтын демалыс орыны болмақ, – деді облыс әкімінің орынбасары.
Бұдан кейін лебіздер легін «Қазақмыс» корпорациясы» жауапкершілігі шектеулі серіктігінің Жезқазған тау-кен өндірісі бас директоры Данияр Жаналинов ұтымды жалғастырды.
– Өзіміз де Ұлытаудың тумасы болғандықтан туған жерімізге жанымыз ашып тұрады. Келешекте «Қазақмыс» арқылы атқарылатын маңызды жобалар бар. Сол жобалардың аясында әлі де аймағымызды көркейтуге қолдау көрсетеміз, – деді Бас директор.
Ал, «Қазақмысқа» алғысты Ұлытау тұрғындары атынан еңбек ардагері Мақсұт Оспанов айтты.
– Қазақта керемет сөз бар «Бұлақ көрсең, көзін аш» деген. Бүгін Ұлытаудың іргесіндегі қасиетті бұлағымыз абаттандырылып, туризмді дамытуға мүмкіндік беретін жақсы жобаны іске асырып отырған «Қазақмыс» корпорациясы» мен облыс әкімдігіне аудан халқы атынан рақметімді айтамын. Ұлытаудағы Әулиетаудың қасиеті қандай жоғары болса, Тасбұлақтың да маңыздылығы сондай жоғары. Осындай керемет жерді «Қазақмыс» корпорациясының абаттандырып бергені ел болып қуанатын жағдай. Келешекте де Ұлытау төңірегіндегі басқа да қасиетті орындарды дамытуға «Қазақмыс» корпорациясы» қолдау көрсетсе нұр үстіне нұр болар еді. Әсіресе, Әулиетауға шығар жол жасалса, сонымен қатар, аудан орталығындағы көл айналасы абаттандырылса, туризм саласын дамытуымызға септігі тиер еді, – деді ел атынан сөйлеген еңбек ардагері.
Шара соңында «Тасбұлақ» демалыс орнының лента қию рәсімін облыс әкімінің орынбасары Жәнібек Мақсұтұлы, Жезқазған тау-кен өндірісінің бас директоры Данияр Кеңгірбайұлы, аудандық ардагерлер кеңесінің төрағасы Серік Нығметұлы жүзеге асырды.
Енді Тасбұлақ тек аудан тұрғындары үшін ғана емес, өңірге келген туристерді де қарсы алып, шығарып салатын демалыс орны на айналмақ. Өйткені Тасбұлақ суы – шипалы қасиеті – аса зор, сақталу мерзімі – ұзақ, мөлдір су. «Өркештау» биігінің іргесінен бастау алып, ағып жатқан табиғи қайнар су көзі. Ол тау тастарының арасынан табиғи сүзбеден өтіп, үлкен мөлшердегі қысыммен гранит тасты жарып шығатын кәусар бұлақ.
Бүгінде Тасбұлақ суының кереметіне тамсанатын жұрт аз емес. Тіпті, сыртқары жерлерден бұлақ суын жылдың төрт мезгілінде де арнайы тасымалдап ішетін адамдардың қатары жыл сайын арта түсуде. Өйткені, гранит тасты жарып – шығып, тынымсыз ағып жатқан бұлақ суы – өте жұмсақ. Оның тастай суынан ішкен адам өзінің бойында пайда болған жеңілдікті сезбей де қалады. Бетіңді жуа қалсаң, көңілің сергіп, тұла бойың жеңілдеп қоя береді. Бұлақ суының ғажаптығы осында.
Бұл жөнінде Ұлытаудың төл перзенті, есімі төрткүл дүниеге танымал академик Төрегелді Шарманов та «Тасбұлақ» суының сегіз түрлі ауруға ем екендігін айтқан болатын. Бұлақ суының құрамында адам ағзасына пайдалы дәрумендер мол екен. Бір жылдары Ұлытау аудандық әкімдігінің сұранысы бойынша аудан аумағындағы табиғи бұлақ суларының сапалық деңгейі көрсеткішін анықтау мақсатында Тағамтану институтының білікті мамандары арнайы зертханалық жұмыстарын жүргізді. Сол сараптама қорытындысы талайды таңқалдырды. Тасбұлақтың суы өте таза, құрамының сипаттамасы бойынша тым сирек кездесетін су екені анықталды. Былай қарағанда, Тасбұлақ – қасиет дарып, кие қонған өңірге Жаратқан иемнің өзі тарту еткен сыйы іспетті.
Қайрат ЖҰМАБАЙ.
