Талқыда – өзекті мәселелер
Аудан әкімі Советбек МЕДЕБАЕВТЫҢ төрағалығымен мемлекеттік рәміздер жөніндегі аудандық комиссияның отырысы өтті. Комиссия отырысында аудандық ішкі саясат бөлімі басшысының міндетін атқарушы Айболат Рахмания аудан бойынша мемлекеттік мекемелердегі рәміздердің стандартқа сәйкестігін тексеру және талапқа сай емес мемлекеттік рәміздерді жою, ауыстыру туралы хабарлама жасады. Хабарламадан кейін комиссия мүшелері аудандағы барлық мемлекеттік мекемелердің рәміздері бекітілген ережеге сәйкес болуын негізге алып, өз ұсыныс-пікірлерін білдірді.
Аудан әкімі Советбек Тұрсынұлы осындай жұмыстарды аудан орталығында ғана емес, кент, ауылдық округтерде де жалғастыруды тапсырды.
* * *
Аудан әкімінің төрағалығымен өңірдегі діни бірлестіктердің аудандық комиссия отырысы өтті. Комиссия отырысында діни экстремизм мен терроризмнің, теріс діни ағымдардың алдын алу мәселелері туралы, 2021 жылдың І жартыжылдығында аудан бойынша атқарған жұмыстары жайында аудандық ішкі саясат бөлімі басшысының міндетін атқарушы Айболат Рахмания ақпарат берді.
Мәлімдемесінде, аудан көлемінде мемлекеттік тіркеуден өтпеген мешіттер туралы, сонымен қатар, халық сұранысы бойынша жаңадан мешіттер салу жайында да біраз мәселелерді қамтыды.
Жиын соңында аудан әкімі Советбек Тұрсынұлы бұл мәселелерге байланысты ақпараттық насихатты жетілдіруді, кент, ауыл тұрғындарымен түсіндірме жұмыстарын тиянақты жүргізуді тапсырды.
Жасұлан АЯШЕВ
