Сұлулық салоны мен шаштараз ашылды

Күні кеше Ұлытау ауданы орталығында жаңа шаштараз және сұлулық салоны тұрғындарға есігін айқара ашты. «Самир» атауы телінген жаңа нысан иесі – Жазира Сәрсенбаева.

Жас кәсіпкер «Тәуелсіздік ұрпақтары» республикалық жобасы аясында Ұлытау ауданы әкімінің жас кәсіпкерлерді қолдау және дамытуға арналған грантын жеңіп алып, 3 млн. теңге көлемінде қаржы алған болатын.
Адал нәсібін жеке кәсібінен теруге бел буған Жазира Еділбайқызы аудан тұрғындарына шаштараздан бастап, басқа да қажетті қызмет түрлерін көрсетуде. Істі ілкімді жүргізуге ниеттенген Жазира тырнақ әрлеу қызметін де назардан тыс қалдырмапты. Салон іші заманауи үлгідегі құрал-жабдықтармен толыққанды қамтамасыз етілген. Сырт көзге көрнекті, әдемі көрінеді. Шаштараз маманның іс-қимылы да тұтынушылар көңілінен шығып жатқан сыңайлы.
Нысанның ашылу рәсімінде ыстық лебізін білдірген Ұлытау аудандық қоғамдық кеңес төрағасы Серік Баймағанбетов жас кәсіпкердің жүйелі жұмысы кейінгі буынға үлгі боларлықтай іс екенін айрықша атап өтті. Бұдан кейін «Атамекен» ҰКП Ұлытау аудандық филиалының директоры Аманбек Сүлейменов, аудандық мәслихаттың депутаты Гүлдана Асанханова жас кәсіпкердің тыңнан бастаған ісіне сәттілік тілеп, жаңа нысанның лентасын қиды.
«Жас келсе – іске» ұстанымын басшылыққа алып, жаңа іске білек сыбана кіріскен Жазира Еділбайқызын біз де әңгімеге тартқан едік…
– Бала кезімнен сұлулық салонын ашуды армандаушы едім. Осы бағытта арнайы курстан өтіп, сертификат алдым. 2024 жылдың желтоқсанында аудан әкімінің 3 млн. теңге көлеміндегі грантына ие болдым. Сол қаржыға қажеттінің бәрін түгелдей сатып алдым. Бүгін соның арқасында сұлулық салонын ашып отырмын. Салонда ер адамдарға арналған шаштараз да жұмыс істейді. Онда жұбайым – Ғинаят Советұлы жұмыс атқарады. Қазір екі адамды жұмыспен қамтудамын. Алдағы кезеңге жоспарлар баршылық. Солардың барлығын сәтімен жүзеге асырғым келеді, – дейді өз жоспарларымен бөліскен іскер келіншек.

Қайрат ЖҰМАБАЙ.