Құрметті Ұлытау ауданының тұрғындары!
Баршаңызды 1 наурыз – Алғыс айту күнімен шын жүректен құттықтаймыз!
Алғыс айту күні – бұл ең алдымен, елімізде тыныштық пен үндестік, өзара сенімділік пен барлық қазақ халқына деген құрметтің орнығуына негіз болған Тұңғыш Президентіміздің бейбітшілік пен келісім саясатының салтанат құратын күні. Бұл – тағдыр тәлкегімен Қазақстан жеріне еріксіз қоныс аударылған түрлі этнос өкілдерінің қасиетті қазақ жері мен қонақжай қазақ халқына терең тағзымының белгісі. Қазақ халқы қиын-қыстау заманда олардың басына түскен ауыртпалықты қайыспай, бірге көтере білді. Осынау ұлағатты ұстаным бүгінгі таңда еліміздегі түрлі этностар арасындағы адамгершілік қарым-қатынастың өнегелі өлшеміне айналды. Бұл күн – Қазақстанның тағдыр тоғыстырған көп этносты халқының ортақ тарихын құрметтеу және қайырымдылық дәстүрлерін, әлеуметтік ынтымақтастықты және өзара көмек көрсетуді қолдау күні.
Біздің ауданымыз – түрлі этностар өзара ауызбіршілікте күн кешіп жатқан, ынтымағы жарасқан қасиетті мекен. Өңірімізді мекен етіп отырған түрлі этнос өкілдері аудан өмірінің әр саласында қажырлы еңбек етіп, әлеуметтік-экономикалық дамуына өздерінің лайықты үлесін қосуда. Осы жайт еңбек қатынастары арқылы бір ортада біте қайнасқан тұрғындардың өзара сыйластығы артып, бір-біріне деген алғысының артуына мол ықпал етуіне себеп болары сөзсіз.
Қадірменді жерлестер!
Бұл мереке – мемлекет құраушы ұлт ретінде қазақ халқына өзге ұлт өкілдерінің алғысын жеткізетін күн. Бір-бірімізге деген құрметіміз артып, бірлігіміз беки берсін!
Баршаңызға мықты денсаулық, отбасыларыңызға қуаныш, бақыт тілейміз!
Бағдат БАЙЖАНТАЕВ,
Ұлытау ауданы әкімінің міндетін атқарушы.
Аманжол МЫРЗАБЕКОВ,
аудандық мәслихаттың хатшысы.
