Құрметті білім беру саласының қызметкерлері мен мектеп оқушылары!

Баршаңызды 1 қыркүйек – Білім күнімен және жаңа оқу жылының басталуымен құттықтаймыз!

Оқушылардың жан-жақты дамуына сапалы білім алуына бар мүмкіндікті қарастыру – біздің басты міндетіміз. Сол себепті аудан мектептерін жаңа заманға сай құрылғылармен жабдықтау жұмыстары жыл сайын жалғасып келеді. Шындығында, ертеңгі күн бүгінгі ұрпақтың білім мен тәрбиесіне төгілген тердің өлшемімен таразыланады. Сондықтан, ел ертеңінің жарқын болуына, сауатты да салауатты ұрпақ қалыптастыруда мемлекет үшін білім саласы қашанда маңызды болып қала бермек. Себебі, білімнен қуатты күш жоқ, сонымен қатар, біліммен қаруланған адам жеңілмейді. Қазіргі таңда бүкіләлемдік жаңа идеология ең әуелі білімнің теңдессіз күшіне арқа сүйейді.
Абай атамыз «Адамның көңілі шын мейірленсе, білім-ғылымның өзі де адамға мейірленіп, тезірек қолға түседі» деген болатын. Сондықтан, бүгінгі өскелең ұрпақ ілім-білім жинауға қашанда асығып, Тәуелсіз еліміздің игілігі жолында білімдерін ел кәдесіне жаратып, болашақта Қазақ елінің озық ойлы, өрісі кең, өрелі азаматтары болуы қажет.

Қадірлі ұстаздар!

Сіздерге өскелең ұрпақты тәрбиелеу жолындағы еңбектеріңіз үшін алғыс айта отырып, алдағы Білім күнімен құттықтаймыз!
Баршаңызға зор денсаулық, еңбекте табыс тілейміз.

Аманжол МЫРЗАБЕКОВ,
Ұлытау ауданының әкімі.
Ахат ҚҰРМАНСЕЙІТОВ,
аудандық мәслихаттың төрағасы.