Маңызды міндеттер межеленді
Ұлытау облысы әкімі Дастан Рыспековтің төрағалығымен кезекті аппарат жиыны өтті. Өңір басшысы алдымен облыстық Әділет департаментінің жаңа басшысын таныстырды.
Кеңестің күн тәртібінде жаңа оқу жылына дайындық және бюджеттің кіріс бөлігінің 7 айдағы орындалуы және жыл соңына дейінгі міндеттер мәселелері қаралды.
Өңір басшысының айтуынша облыстағы орын тапшылығы мәселесін жеке балабақшалар салу арқылы шешу жолдарын қарастыру қажет. Бұл ретте облыс әкімі бөбекжайлар құрылысын жүргізуге ниетті инвесторлар қарастырып, ұсыныс енгізбеген білім басқармасының жұмысын қатаң сынға алды және кәсіпкерлерді жұмылдыру ісін қолға алу мақсатында бір айдың ішінде арнайы Жол картасын дайындап көрсету міндетін жүктеді.
Сондай-ақ кеңесте білім беру саласындағы кадрлардың сапасы мәселесі де көтерілді. Облыс әкімі өңірдегі педагог тапшылығын азайту үшін «Дипломмен ауылға» бағдарламасы бойынша түсіндірме жұмыстарын күшейтуді, бос жұмыс орындары жәрмеңкелерін өткізуді, кадрлардың білім деңгейіне басымдық беруді тапсырды.
Сонымен қатар, педагогтердің тұрмыс жағдайын жақсарту, көтермеақы төлеу, сырттан келген мамандарға жатақхана, пәтер беру сынды қолдаулар жасау мәселелері де назардан тыс қалмады. Облыс әкімі аталған сұрақтарға қатысты тиісті ұсыныстар енгізу қажеттігін жеткізді.
Жергілікті бюджетке қосымша түсімдерді қамтамасыз ету мақсатында жыл басында бекітілген жол картасы тармақтарының орындалу деңгейі бойынша кемшіліктерді жою, ақпараттар ұсынуды жеделдету ісін қолға алуды тапсырды.
Сондай-ақ өңір басшысы республикалық бюджетке түсімдер жоспарының орындалуын күшейту қажеттігін атап өтіп, қосымша резервтер қарастырып, салық базасымен жұмысты жандандыру шараларын қабылдау міндетін жүктеді.
