Ұлытау облысында сүт безінің ісігіне ота сәтті жасалды
Қазақ онкология және радиология ғылыми-зерттеу институтының білікті мамандары Ұлытау облысына арнайы жұмыс сапарымен келді. Сапар мақсаты — аймақ тұрғындарына білікті онкологиялық көмек көрсету және медициналық қызметтердің қолжетімділігін арттыру.
Сапар аясында жоғары санатты дәрігер-онкомаммолог Марат Исмаилов сүт безіне секторалды резекция жасау бойынша екі ота жүргізді. Науқастар — 19 және 40 жастағы Ұлытау өңірінің тұрғындары. Олардан бұған дейін сол жақ сүт безінің фиброаденомасы анықталған болатын.
Ота сәтті өтіп, нәтижесінде 19 жастағы қыздан көлемі 6×7 см болатын, ал 40 жастағы әйелден 1,5×2,5 см ісік алынды.
Айта кету керек, операция алдындағы барлық дайындық — зертханалық талдаулар мен диагностикалық тексерулер, сондай-ақ хирургиялық араласудың өзі міндетті әлеуметтік медициналық сақтандыру (МӘМС) аясында тегін жүргізілді.
Осылайша, мамандардың Ұлытауға келуі — науқастардың өз туған жерінде сапалы медициналық көмек алуына мүмкіндік берді.
Фиброаденома — бұл қатерсіз ісік болғанымен, уақытында алынбаса, қатерлі ісікке (обырға) айналу қаупі бар. Сондықтан уақытты өткізіп алмау, маммологқа дер кезінде қаралу — өте маңызды.
Бұл дерт тек ересек әйелдерде ғана емес, жастарда да жиі кездеседі. Сондықтан, мамандар әйелдер қауымын скринингтен уақытылы өтуге шақырады. Скринингтер бүгінде мемлекет тарапынан халықтың барлық деңгейіне қолжетімді етілген.
