Конституция күніне арналған танымдық кеш

Ұлытау ауданының Мәдениет және тілдерді дамыту бөлімінде Қазақстан Республикасының Конституциясының 30 жылдығына арналған «Ата Заң – ел тірегі» атты танымдық квиз-ойын ұйымдастырылды.

Шараны Ұлытау ауданының прокуратурасы мен Жастар ресурстық орталығы бірлесе өткізді. Мақсаты – жастардың құқықтық сауаттылығын арттыру, Ата Заңымыздың маңызын түсіндіру және патриоттық құндылықтарды дәріптеу болды.
Алдымен, жиында Ұлытау ауданы прокуратурасының аға прокуроры Нұрдаулет Жаңабайұлы Конституцияның қоғамдағы рөліне тоқталды.
– Қазақстан Республикасының Конституциясы – тәуелсіздігіміздің, бірлігіміздің және болашағымыздың берік негізі. Заңды құрметтеу – әр азаматтың парызы, – деді ол. Шара барысында Конституцияның негізгі қағидалары, яғни мемлекеттің демократиялық, құқықтық, әлеуметтік сипаты және билік тармақтарының бөлінісі жайлы маңызды деректер айтылды. Сонымен қатар, жастар құқықтары мен бостандықтарының мемлекет үшін ең қымбат қазына екендігі ерекше атап өтілді. Жастар белсенді түрде сұрақтарға жауап беріп, құқықтық сауаттылық жайлы өз ойларымен бөлісті. Интеллектуалдық ойын барысында қатысушылар Қазақстан Конституциясы туралы білімдерін шыңдап, жеңімпаздар арнайы марапаттарға ие болды. Іс-шара соңында ұйымдастырушылар әрбір азаматтың Ата Заңды білуге, құрметтеуге және қорғауға міндетті екенін еске салды.
– Конституцияны құрметтеу – мемлекетті құрметтеу. Жастардың заңға деген құрметі – елдің тұрақтылығы мен дамуының кепілі, – деді ұйымдастырушылардың бірі Ұлытау ауданының жастар ресурстық орталығының инспекторы Назар Жасұланқызы.
Осылайша, Ұлытауда өткен танымдық квиз жас буынға құқықтық мәдениетті насихаттап, елдің негізгі құжатына деген құрметі арта түсті.

Ақбота ЕСЕНҚАБЫЛ.