Ілгерілеу үрдісі байқалады
Қаракеңгір ауылдық округінің әкімі Жалғас ТӨРЕНІҢ тұрғындар алдындағы есеп беру кездесуіне аудан әкімінің орынбасары Бағдат БАЙЖАНТАЕВ қатысты. Жиында сонымен қатар, аудандық деңгейдегі құзырлы мемлекеттік мекемелер мен бөлімдердің басшылары, БАҚ өкілдері болды.
Ауылдық округ аумағында өткен жылы атқарылған жұмыстар жөнінде ауыз толтырып айтуға болады. «Жұмыспен қамтудың жол картасы – 2020» бағдарламасы аясында №4 орта мектебі мен клуб үйі күрделі жөндеуден өткізілген. Аудан әкімінің жас кәсіпкерлерді қолдауға арналған 700 мың теңгені құрайтын грантына ие болған ауыл тұрғыны Алтынай Естай кондитер цехын ашқан. Ол бүгінгі күні өз өнімдерін жерлестеріне қолжетімді бағамен ұсынуда. «Ұлытау-Қаракеңгір» бағытындағы 40 шақырым автокөлік жолының 16 шақырымы асфальтталған. Аталған жұмыс көлемі алдағы уақытта толықтай аяқталуы тиіс. Ауызсу мәселесінде кедергі жоқ, үйлерге тұрақты түрде беріліп отыр. Орталықтағы балалар ойын алаңы талапқа сай ретке келтіріліп, тиісті жөндеу жұмыстары жүргізілген. Ауылдағы 88 үйге интернет желісі тартылған. Алдағы уақытта ауыл тұрғындары Теле-2 байланыс операторының қызметін пайдалану мүмкіндігін иеленетін болады. Ауыл басшысы өз баяндамасында осы және өзге де жайттарды тілге тиек етіп, биылғы жылы қолға алынуы тиіс шаруалар жөнінде де жан-жақты баяндады.
Өз кезегінде Бағдат Тілеуліұлы округ аумағындағы шаруа қожалықтарына келуші жұмыскерлерді уақытылы тіркеп, ауыл азаматтарын жұмыспен қамтуға қатысты түсіндіру жұмыстарын дер кезінде жүргізу маңызды екендігін атап айтты. керектігін айтты. Ол сондай-ақ, ауыл әкіміне мектеп ауласындағы бағандардың шамдарын жаңарту мен басқа бірқатар мәселелер бойынша нақты тапсырмалар берді.
Ауыл тұрғындары «Ұлытау-Қаракеңгір» автокөлік жолының сапасына қатысты пікір білдіріп, ауызсу тарату жүйесінің түйткілді тұстарына назар аударды.
Аудандық полиция бөлімінің басшысы Еркебұлан Байзақов пен аудандық кәсіпкерлік бөлімінің басшысы Гүлнар Ауғанова өздері жауапты салалар бойынша тың ақпараттармен бөлісіп, тұрғындардың сұрақтарына жауап берді.
Жасұлан АЯШЕВ
ҚАРАКЕҢГІР ауылы.
