Газет – оқырманымен көрікті

Аудандық «Ulytau» газеті ұлт ұясы шежіресін 85 жыл бойы тасқа басып, таңбалап келе жатқан аудандағы жалғыз басылым. Келесі жылы да газет мазмұны мен сапасында оқырман үдерісінен шығатындай мәнді жазбалар болмақ.

Бүгінде аудан оқырмандары өлке жаңалығынан құлақдар болып, кенттер мен ауылдардың қазіргі таңдағы келбеті жайлы жазылған дүниелерді оқуға құштар. Газет жанашырларының да қатары көбеюде. Аудандық «Ulytau» газеті оқырмандар талғамымен үндес басылымға айналды десек, артық айтқандық емес. Тұрғындар тарапынан алдағы жылға баспасөзге жазылуға қолдау білдіріп жатқан азаматтар да бар. Солардың бірі – Қарсақбай кентіндегі ветеринариялық пунктінің меңгерушісі Ержігіт Сәрсенбаев. Ол жылдағы дәстүрінен биыл да жаңылмай, өзі бастап, қарамағындағы қызметкерлерін де аудандық «Ulytau» газетіне жаздырды.
Ұлтжанды азамат әр апта сайын арнайы «Ulytau» газетінің редакциясына келіп, Жезді, Қарсақбай кенттері тұрғындарының газеттерін алып-кетіп те жүреді. Ол газет жанашыры ғана емес, ойлы оқырман. Газет бетіне жарияланған мақалаларды да үзбей оқып отырады. Өзінің ой-пікірлерін де айтып жатады. Оның жергілікті басылымға қолдау көрсеткені ілкімді іске зор ынтамен өз үлесін қосқандығы, әрі Ұлытаудың ұлық мәртебесіне көрсеткен құрметі. Осындай игі іске ұйытқы болып жүрген Ержігіт Жұмағалиұлына біздің де айтар алғысымыз шексіз.

Қайрат ЖҰМАБАЙ.