«Гүлденсе ауыл – гүлденеді еліміз»
Аптаның басында облыс орталығында осындай атаумен ауыл шаруашылығы еңбеккерлерінің форумы өтті. Іс-шара «АгроQazaq: Техника. Өнім. Болашақ» атты көрмені тамашалаудан басталып, ауыл шаруашылығы техникаларының соңғы үлгілері, жергілікті кәсіпкерлердің табиғи өнімдері мен өндірістік жаңалықтары көпшілік назарына ұсынылды. Көрмеге қойылған шағын цехтардың өнімдері, қолөнер бұйымдары мен экологиялық таза тағамдар – өңір кәсіпкерлігінің жаңа бағытта дамып келе жатқанын көрсетеді.
Форумды Ұлытау облысының әкімі Дастан Адайұлы Рыспеков, Мәжіліс депутаты, аграрлық комитет төрағасы Серік Егізбаев, ҚР Ауыл шаруашылығы вице-министрі Аманғали Бердалин, Мәжіліс депутаты, фермерлер қауымдастығының төрағасы Жигули Дайрабаев, облыстық мәслихат төрағасы Бауыржан Шыңғысов ашып, саладағы жағдайға қатысты маңызды пікірлерін ортаға салды.
Ұлытаулықтар марапат төрінде
Форум барысында өз еңбектерімен ел дамуына үлес қосып жүрген шаруа қожалықтарының иегерлері мен жекелеген кәсіпкерлер Мемлекеттік және өңірлік деңгейлердегі марапаттарға, салалық марапаттарға ие болды. Атап айтқанда ауданымыздағы «Бек-Би» қожалығының жетекшісі Жарқымбек Қожамсейтов ІІІ дәрежелі «Еңбек даңқы» орденімен марапатталды. Сондай-ақ, бірқатар еңбек озаттарына ҚР Премьер-Министрінің Алғыс хаты, Мәжіліс төрағасы Ерлан Қошановтың Құрмет грамотасы, Ауыл шаруашылығы министрінің марапаттары, облыс әкімінің Алғыс хаттары тапсырылды.
Форум қарсаңында 7 номинация бойынша облыстық байқау өткізіліп, жерлестеріміз төмендегідей марапаттарға ие болды:
Ұлытау аудандық ветеринарлық станциясының Қаракеңгір ауылдық округінің ветеринарлық пункт меңгерушісі, мал дәрігері Құдайқұлов Мұрат Досмағанбетұлы – «Үздік ветеринар»,
Ұлытау ауданы «Бекетай – Баба» шаруа қожалығының механизаторы Досанов Бауыржан Мұхтарұлы – «Үздік тракторшы машинист»,
Ұлытау ауданы «Колов» шаруа қожалығының басшысы Колов Марғұлан Шәкірұлы – «Үздік жылқышы», Ұлытау ауданы «Бекен» жеке кәсібінің басшысы Тұрмағамбетова Айгүл Жанғазықызы – «Ауыл шаруашылығы өнімдерін өңдеу ісінің үздік шебері» атанды. Олардың әрқайсысы естелік статуэтка және 500 мың теңге сыйлыққа иеленді.
Тәжірибе – ортақ, мақсат – бір
Форум барысында Алмат Саухимов – облыстық ауыл шаруашылығы басқармасы басшысы, Бошымов Бауыржан – «Асыл түлік» АҚ, Төлеген Жаманов – ауыл шаруашылығы саласының сарапшысы, Саян Майгарин – «Астана Плем Сервис» ЖШС, Нұрсұлтан Жарылғапов – «Жеңіс» ЖШС басшысы салалық баяндамалар жасап, саладағы түйткілдер мен олардың шешу жолдары талқыланды. Фермерлерді сапалы ресурстармен қамтамасыз ету, субсидиялау жүйесін жетілдіру, суару жүйелерін қалпына келтіру, техниканы жаңарту, цифрландыру, қолдан ұрықтандыруды дамыту мәселелері кеңінен сөз болды.
Сала мамандарының бірі – Төлеген Жамановтың әр аудан мен қалаларда фермерлерге арналған тұрақты семинарлар өткізу, ақпараттық қолдауды күшейту жөніндегі ұсынысы ерекше қолдауға ие болды. «Фермерлердің білгенінен білмейтіні көп» деген сарапшы пікірі саладағы білім мен ақпараттың маңызын дәлелдейді.
Ұлытау облысының әкімі Дастан Рыспеков форумда өңірдің агросаласына бөлінген мемлекеттік қолдау бағыттарын атап өтті. Биыл 4,4 млрд теңге субсидия бөлініп, 780 шаруашылық қолдау алған. Жыл басынан бері 200-ден астам жаңа ауыл шаруашылығы техникасы сатып алынды. Өңір құрылғаннан бері салаға 8,5 млрд теңге инвестиция тартылды. 2024 жылы тартылған инвестиция көлемі өткен жылмен салыстырғанда 46% артты. Бұл көрсеткіштер ауыл шаруашылығының облыста нақты қарқынмен дамып келе жатқанын дәлелдейді.
Ұлытау облысындағы ауыл шаруашылығы форумы – ауылға деген жаңа көзқарастың, жаңа серпіннің, жаңа бастаманың бастауы болды. Ең бастысы – осы. Ауыл гүлденсе, елдің еңсесі көтеріледі. Ауыл еңселі болса, мемлекет мықты болады.
Ізтай БЕЛГІБАЙҰЛЫ.
