Еңбекқор адамның – ертеңі жарқын
Мемлекет басшысы Қасым-Жомарт Тоқаев тапсырмасымен бекітілген «Жұмысшы мамандықтары жылы» аясында өз таңдаған мамандығымен адал еңбек етіп, еліміздің дамуына өзіндік үлес қосып жүрген жастар баршылық. Солардың бірі – Ұлытау аудандық денешынықтыру және спорт бөлімінің электригі Дәуіт Әбілжаппаров.
Ол Қазақстан Республикасы Еңбек және халықты әлеуметтік қорғау министрлігі жүзеге асырып отырған «Жұмыс күшінің ұтқырлығын арттыру мақсатында ерікті түрде қоныс аударуға жәрдемдесу» бағыты аясындағы мемлекеттік бағдарлама бойынша Ұлытау ауданына келген жас маман.
Дәуіт Әбдірасулаұлы 1998 жылы 11 қарашада Қызылорда облысы, Сырдария ауданы Іңкәрдария ауылында туған. Сол ауылдағы №191 орта мектепте оқыған. Жасынан алғыр, елгезектігімен көзге түскен ол аудандық, облыстық байқауларда ғылыми жобаларымен танылып, «үздік оқушы» атанады. 2016 жылы орта мектепті «жақсы » бағамен аяқтап, Жаяу Мұса атындағы Ақсу жоғары көпсалалы колледжіне «техник-электрик» мамандығына грантқа оқуға түседі.
Аталған оқу орнын 2019 жылы ойдағыдай тәмамдап, оқытушыларының ұсынысымен өзі оқыған колледжге «өндіріс шебері» болып жұмысқа қалады. Кейіннен 2021-2024 жылдары «Резонанс» ЖШС кәсіпорнында вахталық әдіспен электрик болып қызмет етеді. Биыл, 2025 жылдың жаз айында отбасымен оңтүстіктен-солтүстікке «Көші-қон» бағдарламасы арқылы Қызылорда облысынан Ұлытау ауданына көшіп келді. Оның мамандығы біздің ауданға сұранысы жоғары ең керек мамандық болғандықтан, аудан халқы бұл отбасын келген бетте-ақ, жылы шыраймен қарсы алды.
Дәуіт Әбдірасулаұлының зайыбы – Күләндә Жетібайқызы. Екеуі бір ұл, бір қыз тәрбиелеп отырған жас отбасы. Қазір Дәуіт өңір халқы алдында сыйлы, беделді. Ол өз ісіне адал, білікті маман. Оның еңбектегі табандылығы – еліміздің нағыз еңбек адамдарының бейнесін айқын көрсетеді. Осындай өз жұмысын сүйетін жас маман ісі басқаларға да үлгі болуда. Өйткені, Дәуіттің жұмысқа тиянақтылығы, ісіне адалдығы, кәсібіне деген жауапкершілігі, ауданның өсіп-өркендеуіне бағытталған ұмтылыстың жарқын үлгісі іспетті.
Қайрат ЖҰМАБАЙ.
