Білікті онкологтар қабылдау жүргізуде
Қазақ онкология институтының онкологтар тобы Ұлытау облысына жұмыс сапарымен келді. Сапардың басты мақсаты – өңірлік онкологиялық қызметті қолдау, ұйымдастырушылық-әдістемелік көмек көрсету және онкологиялық аурулармен күрес жөніндегі Кешенді жоспардың іске асырылуына мониторинг жүргізу.
Жезқазған қаласындағы облыстық көпбейінді аурухананың базасында бір апта бойы пациенттерді қабылдайтын білікті мамандар асқазан-ішек, тыныс алу, бүйрек-несепағар жолдары, бас, мойын, кеудедегі қатерлі ісіктер бойынша кеңес беріп, ем жүргізуде.
Мысалы, Қарағанды облысының жоғары санатты уролог-онкологы Анатолий Красножен амбулаторлық жағдайда гидронефроз диагнозы бар жезқазғандық келіншектің бүйрегіне түтікше орнатып, ағзаға жиналған несепті шығарды. Ауырсынудан құтылған науқас алдағы күндері дәрігерлердің қатаң бақылауында стационарда ем алады. Дертінің беті бері қарамаса бүйректі сақтап қалу үшін ота жасалады.
Онкология – бұл үкім емес. Қазіргі медицина қатерлі ісікті ерте сатысында анықтап, оны тиімді емдеуге мүмкіндік береді. Ең бастысы – ауруды асқындырып алмау. Сол себепті скринингтік тексерулерден уақытылы өту маңызды. Бұл – өзіңізді және жақындарыңызды аман сақтаудың ең қарапайым әрі тиімді жолы.
Аты жаман аурумен күрес жолында 2025 жылдың қыркүйегінен бастап онкоскринингтер сақтандыру мәртебесіне қарамастан барлық қазақстандықтарға қолжетімді бола түспек.
Бүгінгі таңда облыста онкологиялық аурумен шамамен 2500 адам есепте тұр. Жыл басынан бері 260 тұрғынға осы диагноз қойылды. Оның ішінде 66 жағдай онкологияның І сатысы, 62 жағдай ІІ сатысы, 55-і ІІІ сатысы және 56 жағдай IV сатында анықталған.
Онкологиялық дертке күмәнді науқастар үшін жасыл дәліз қарастырылған. Яғни олардың ауруын анықтайтын тексеріс барысында қағаз бастылыққа, ұзын-соңар кезектерге жол берілмейді.
Онкологтар 22 тамызға дейін Жезқазған қаласындағы облыстық көпбейінді аурухананың 6 қабатында тұрғындарды қабылдайды. Барша оқырмандарды мүмкіндікті жіберіп алмай мамандар кеңесін алуға шақырамыз.
Диана ОРАЗАЛИНА.
