Аудан әкімі ауызашар берді
Он екі айдың сұлтаны, қасиетті Рамазан айының кешінде аудан әкімі Советбек Медебаев «Ұлытау» асханасында кең көлемінде ауызашар өткізді. Молынан жайылған ақ дастарханға селодағы қадірлі ақсақалдар мен ақжаулықты аналар, аудандық мәслихат хатшысы, мекеме басшылары және арнайы қонақ ретінде мешіт жамағаттары шақырылды.
Құран оқумен ашылған отырыстың басында аудандық орталық мешіттің бас имамы Жанболат Рақымбердиев сөз алып, мүбәрак Рамазанмен барша жиналған көпшілікті құттықтады.
Шарапаты мол айда ауқымды ауызашар өтуі, ораза ұстаған жандарды құрметпен қарсы алуы үлкен ізеттілік деп білген имам аудан басшысы Советбек Медебаевқа ризашылығын білдірді.
Аудан әкімі де ақжарма тілегін арнап, өз құттықтауын жеткізді. Игілікті шара соңында абыз ақсақал Тақан Шынбергенов жамағатқа амандық тілеп, ақ батасын берді.
