Шағын футбол алаңы ашылды
Биыл – еліміздің басты заңы, Қазақстан Республикасы Конституциясының қабылданғанына 30 жыл толған мерейлі жыл. Осы атаулы дата аясында Борсеңгір ауылында тұрғындар көптен күткен заманауи шағын футбол алаңы ашылды.
Салтанатты шараға аудан әкімінің орынбасары Алмат Сакипов пен ауылдың қоғамдық кеңес төрағасы Жусанбай Тыныбеков арнайы қатысып, ауыл жастарына жылы лебіздерін білдірді. Алаң ашылуымен қатар, ауылдың жас спортшылары арасында шағын футболдан достық турнир ұйымдастырылып, жасөспірімдер өз шеберліктері мен жеңіске деген жігерлерін көрсетті.
Жаңа спорт нысанының жалпы көлемі 550 шаршы метрді құрайды. Құрылысы ауыл тұрғындарының сұранысы негізінде қолға алынып, аудандық бюджеттен бөлінген қаржы есебінен салынды. Алаң жасанды төсемемен жабдықталып, қоршау және жарықтандыру жүйесі орнатылған. Бұл жер енді ауыл балалары мен жастарының бос уақытын тиімді өткізіп, спортпен айналысуына мүмкіндік береді.
Аудан көлемінде бұқаралық спорт инфрақұрылымын дамыту жүйелі түрде жүргізіліп келеді. Мәселен, биылдың өзінде Ұлытау ауылдық округінде футбол алаңы мен баскетбол-волейбол алаңы, Терісаққан ауылында жабық футбол алаңы пайдалануға берілді. Сонымен қатар, Шеңбер ауылында демеушілік есебінен шағын футбол алаңының құрылысы басталса, Қоскөл ауылдық округінде жабық футбол алаңының құрылысы аяқталуға жақын. Оның ашылуы тамыз айының соңына дейін жоспарланып отыр.
Борсеңгір ауылындағы жаңа футбол алаңы – ауылдың әлеуметтік және мәдени өмірін жандандыратын, жастарды спортқа баулып, салауатты өмір салтын насихаттайтын маңызды нысан.
Ізтай БЕЛГІБАЙҰЛЫ.
