Тапсырма – орындалуымен құнды
Аудан әкімі Советбек МЕДЕБАЕВ Ұлытау ауылдық округінің әкімі Талғат ӘБЖАППАРОВҚА көшелерді жарықтандыру сапасын арттыра түсуге қатысты берген тапсырмасының орындалу деңгейін тексеру мақсатында аудан орталығын арнайы аралап, жұмыстың жүргізілу жайын тікелей өзі бағамдады.
Қазіргі таңда көшелердің жарықтандыруды одан әрі жетілдіру жұмысы қолға алынып, сол бағыттағы іс-қимылдар жүйелі жүзеге асырылуда. Аудан басшысының көшелерді аралауы кезінде орталықтағы Абай көшесінде жөндеу, ретке келтіру жұмысы қызу жүріп жатқан еді. Ауыл әкімі мәлімдегендей, өзге көшелердегі осындай сипаттағы жұмыстар да жуыр маңда толықтай әрі сапалы тиянақталуы тиіс.
Жалпы аудан бойынша көшелерді жарықтандыру, оның ішінде, кемшін тұстарды талапқа сай жөнге келтіру ісі жалғасын таба беретінін айтқан Советбек Тұрсынұлы мәселені тікелей өз бақылауында ұстайтынын ескертті. Ол сонымен қатар, тапсырма орындалуымен құнды екендігіне назар аударды.
Бұдан кейін аудан басшысы көктемгі су тасқынына байланысты алдын алу шараларының жай-күйін бағамдады. Оның қорытындысында аудандық төтенше жағдайлар бөлімінің басшысы Нұрбек Сабағановқа нақты тапсырмалар берді.
Жасұлан АЯШЕВ.
