Нәзікжандылар – құрмет құшағында

Аудан әкімі Советбек МЕДЕБАЕВ Халықаралық әйелдер күні мерекесіне орай, әр салада еңбек ететін бір шоғыр нәзікжандылар өкілдерін арнайы қабылдап, айрықша құрмет көрсетті. Олардың қазіргі қоғамдағы алар орнын атап өтіп, шынайы пейілмен құттықтады. Мерекелік сый-сияпаттар табыс етті. Қабылдауға аудандық мәслихаттың хатшысы Аманжол МЫРЗАБЕКОВ қатысып, сөз сөйледі.

– Бұл – адамзат баласы үшін, сөздің шынайы мағынасында, ғажайып мереке. Себебі, Ана – ешқандай теңеудің аясына сыймайтын ғаламат ұғым. Ұлт ұясынан ұлағат ұғынған сіздерді де мейірім шуағын шашқан, ізгілік жолындағы жандар деуге толыққанды құқымыз бар.

Мерейлі сәтте баршаңызға мықты денсаулық, бай-қуатты әрі ұзақ ғұмыр, шаңырақ шаттығын тілеймін, – деді Советбек Тұрсынұлы өзінің құттықтау лебізінде.

Құттықтаудан кейін марапаттау рәсіміне жол берілді. Аудан басшысы аудандық кәсіпкерлік және өнеркәсіп бөлімінің басшысы Гүлнар Ауғановаға ҚР Орталық сайлау комиссиясы төрағасының Алғыс хатын тапсырды. Қазақстанның Іскер әйелдері қауымдастығының төсбелгісін кәсіпкер Гүлжазира Көкшинаға, «Көктөбе» шаруа қожалығының иегері Гүлназ Омарова мен аудан әкімі аппаратының бас маманы Алтынай Елеуоваға табыс етті.

Салтанатты қабылдауға арнайы шақырылған әйелдер қауымының өкілдеріне аудан әкімінің Алғыс хаты беріліп, алқызыл гүл шоқтары ұсынылды.

Жасұлан АЯШЕВ