Аяулы ақжаулықты әжелер! Ардақты аналар! Қымбатты апалар мен қарындастар!
Сіздерді жыл мезгілінің ең көрікті де, қуанышты мезгілі – көктемнің алғашқы мерекесінің бірі – 8 наурыз – Халықаралық әйелдер күнімен шын жүректен құттықтаймыз!
Халықаралық әйелдер күні – баршамыз үшін ерекше ыстық мереке. Себебі, бұл, ең алдымен, біздің аналарымыздың мерекесі. Жарық дүниеде адамзат баласы үшін анадан ардақты, анадан асқақ, анадан қымбат ешкім жоқ. «Жұмақтың кілті – ананың табанының астында» деген халқымыз аналарды ардақтауды мұрат тұтқан. Құшағы күннің шуағындай ыстық асыл аналарымыз – көңілдің нұры, ару қыздарымыз – өмірдің гүлі.
Болашағын ойлаған ел алғашқы кезекте әйелдерге құрмет көрсетеді. Еліміз Тәуелсіздіктің алғашқы күндерінен бастап, әйел-ананың әлеуметтік жағдайы мен денсаулығына көңіл аударылуына басымдық беріп келеді. Өйткені, ер – елдің иесі болса, әйел – үйдің киесі.
Қазіргі қоғамда сіздер отбасының күнделікті шаруасын, бала тәрбиесін, шаңырақтың береке-бірлігін ойлайтын тұлға ғана емес, мемлекеттің саяси өміріне белсене атсалысып, еліміздің стратегиялық міндеттерін шешуге зор үлес қосып отырған қоғам мүшелері санатына енесіздер.
Бүгінгі біздің барлық жетістіктеріміз сіздердің жалпы қауымға бағытталатын мейірімдеріңіз бен қамқорлықтарыңыздың арқасында мүмкін болып отыр. Сіздер біздің қоғамдағы бірліктің, жасампаздық пен тұрақтылықтың бейнесіне айналдыңыздар.
Аяулы, асыл жандар!
Махаббат пен төзімділік арқылы әр отбасының береке-бірлігін қалыптастырып, ұлттың дәстүрі мен салтын, мәдениеті мен тарихын, тілін қадірлеуді ұрпақтан ұрпаққа жеткізіп келе жатқан сіздерге айтар алғысымыз шексіз. Баршаңызға сарқылмас күш-жігер, қажымас қайрат пен келешекке деген сенімділік тілейміз. Қоғамдағы тұрақтылық пен ынтымақтың кепілі, жасампаз істердің дем берушісі болып қала беріңіздер!
Өздеріңізге, отбасыларыңызға амандық, дендеріңізге саулық, ұзақ әрі шаттыққа толы ғұмыр, шаңырақтарыңызға құт-береке тілейміз!
Советбек МЕДЕБАЕВ,
Ұлытау ауданының әкімі.
Аманжол МЫРЗАБЕКОВ,
аудандық мәслихаттың хатшысы.
