ЖЫЛЫШЫРАЙЛЫ ЖҮЗДЕСУ ымыра мен ынтаны айғақтады

Халықпен етене байланысу, олардың талап-тілегіне құлақ түру мақсатында Президент Қасым-Жомарт ТОҚАЕВ «Халық үніне құлақ асатын мемлекет» тұжырымдамасын іске асыруды тапсырған болатын. Нәтижесінде, жергілікті мемлекеттік органдар басшылары тұрғындармен жүздесулерін тікелей эфирде өткізіп, олардың сауалына ашық түрде жауап беруде. Бұл бұқара мен биліктің арасын мейлінше жақындастыруға бағытталған бастама десек, Ұлытау ауданы әкімінің міндетін атқарушы Бағдат БАЙЖАНТАЕВТЫҢ дәстүрлі есепті кездесуі сөзімізді салмақты ете түсті. Бұлай дейтініміз, бұл жолғы есеп беру ерекше форматта өткізілді. Бағдат Тілеуліұлы монитордың арғы жағындағы қарашамен онлайн режимде жүздесіп, жыл ішінде атқарылған жұмыстар жөнінде баяндап қана қоймай, әлеуметтік желілер арқылы түскен сауалдарға да жіті назар аударды.

Өткен жыл өрнекті істерге толы болды

Қиындыққа толы болған өткен жылы ауданда ел игілігі үшін біраз шаруа тындырылды. Ауданның негізгі саласы – ауыл шаруашылығы айтарлықтай алға жылжыды. Мал басын асылдандыру, онан алынар өнімді молайтуда ілгерілеушіліктер бар. Егін шаруашылығы да дамып келеді. Дала жұмыстарының пандемия жағдайына байланысты кеш басталғанына қарамастан, күзгі жиын-терім мол болды. Аудан диқандары әр гектардан 11 центнерден астық бастырды. Жалпы, ауыл шаруашылығын дамытуға бағытталған мемлекеттік бағдарламалар ауданда сәтімен жүзеге асырылып, оның нәтижесін шаруа қожалықтары шынайы сезініп отыр.

– Бүгінгі күні ауданда кәсіпкерлік саласы бойынша 1721 шағын орта кәсіпкерлік субъектілері тіркелген, 2019 жылдың сәйкес мерзімінде – 111,0 процент. Бұл саланы дамыту және әртараптандыру мақсатында ауқымды жұмыстар жүзеге асырылып жатыр. Соның бірі де бірегейі – жас кәсіпкерлерді қолдау. Осы мақсатта аудан әкімінің 30 млн. теңге гранты 38 жобаға үлестіріліп берілді. Бүгінгі таңда 38 кәсіпкердің 33-і бизнестерін ашып, жұмыстарын жүргізуде. Қалған 5 кәсіпкер 2021 жылдың І тоқсанында жұмысқа кірісетін болады, – деді Бағдат Байжантаев өз есебінде.

Оның айтуынша, осы жас кәсіпкерлер арқылы экономиканы өрістететін бірден бір сала әртараптандырылып жатыр екен. Яғни, бүгінгі күні ауданда туризмге қатысты, мал өнімдерін өңдеуге қатысты, әлеуметтік салаға қатысты шағын кәсіпкерлік нысандары ашылып, іске кірісуде. Және, олардың нәтижесі де көңіл толарлық деңгейде.

Әлеуметтің әлеуетін арттыратын «Ауыл – ел бесігі», «Жұмыспен қамтудың жол картасы — 2020» мемлекеттік бағдарламалары Ұлытау ауданының да екінші тынысын ашқандай болып отыр. Мысалы, «Ауыл – ел бесігі» бағдарламасы арқылы 2019 жылы аудан орталығында 10 нысан жөнделіп, қайта жаңғыртылса, 2020 жылы Жезді кентінде екі үлкен жоба осы бағдарлама арқылы жүзеге асырылды. Сол арқылы жұмыссыз жүрген жандар өз нәпақаларын тапқан.

– Әлеуметтік — экономикалық тұрақтылықты сақтау және халықты жұмыспен қамту мақсатында, Үкімет дағдарысқа қарсы шаралар әзірледі. Бұл істің тиімділігін аудан жұртшылығы да шынайы сезінді. Пандемияның салдарынан жұмыссыз қалған жандар соның арқасында қоғамдық және әлеуметтік жұмыстарға, құрылысқа, басқа да мүмкіндіктер берген жұмыстарға тартылып, 80 мың көлемінде айлықпен қамтамасыз етілді, – деді Бағдат Тілеуліұлы.

Аудан әкімінің міндетін атқарушының айтуынша, өткен жыл осындай өрнекті істерге толы болыпты. Ондай жетістіктерді ауданның кез-келген саласынан көруге болады, – деді ол.

Алда ауқымды істер тұр

Бағдат Байжантаев атқарылған істермен қатар, алда тұрған міндеттер мен ілкімді жобалар жайлы да баяндап өтті. Мұның дені – әлеуметтік сала мен білім беру саласына қатысты. Атап айтқанда, үстіміздегі жылы аудандағы 8 мектеп жаңғыртылып, олардың жылу қазандықтары ауыстырылатын болады. Мысалы, Аманкелді ауылындағы №3 орта мектеп жөндеуден өтсе, Алғабас ауылындағы жаңадан салынған білім ұясын абаттандыру биылғы жылдың еншісінде тұр.

Үстіміздегі жылы атқарылатын ауқымды істердің басында туризм саласы тұр. Ауданның әлеуметтік-экономикалық әлеуетін көтеретін бұл саланы дамытуға қатысты төрт бағытты қамтитын мүмкіндік бар екен. Оның бірі – агротуризм, екіншісі – этнотуризм, үшіншісі – экотуризм, ал төртіншісі – тағзым туризмі. Міне, осы бағыттарға елді тарту үшін аймақта инфрақұрылым мен көрсетілетін қызмет түрін дамыту қажет. Қазір ауданда осы бағытта ілкімді жобалар жасалып жатыр. Оның басы – қолданыста. Автобекет ашылды. Этноауыл үшін киіз үйлер сатылып алынуда. Ұлттық ат спортын дамыту жұмыстары қолға алынған. Аудан орталығында ипподром салатын орын белгіленіп, оның жобалық-сметалық құжаттары әзірлену үстінде. «Саумал» орталығы өз жұмысын өткен жылы бастады. Індет күшейіп тұрған шақта қанаттас жатқан қос қала мен аудан орталығындағы инфекциялық ауруханаға осы «Саумал» орталығы қымыз жеткізіп тұрған екен. Биыл оның қызметі жанданып, қанатын жая түспекші.

Ауданның коммуналдық саласын жетілдіру бағытында ауқымды жұмыстар атқарылатын болады. Алдағы көктемде орталықтандырылған кәріз жүйесі іске қосылмақшы. Ауызсу құбырлары да жаңғыртылады. Аудан орталығына кіреберіс қақпа жуырда ашылады деп күтілуде. Жолдарды жөндеу жұмыстары жалғасын табады.

Есепті жиында ауданның «бас ауруына» айналған электр желілерінің жайы да кеңінен сөз болды. Бағдат Тілеуліұлы күрделі жайттың түйіні биыл тарқатылатынын жеткізді. Облыс әкімінің араласуымен ток жүйесін ЖРЭК компаниясына өткізу ісі қайыра қаралып жатыр екен. Есеп беру кездесуінде аудан әкімінің міндетін атқарушы әлеуметтік желілер арқылы тұрғындар тарапынан қойылған сауалдарға жан-жақты жауап берді. Сұрақ сан-салалы болды. Бір қуанарлығы, ел жеке бастың емес, тұтас елдің көкейінде жүрген сауалдарды қойып жатты. Олардың қатарында кенжелеп болса да елдің қажетін өтеп жатқан ұялы байланыс, цифрлы технология, ауызсу мен бау-бақшаға қажетті судың жайы, Ұлытау-Арқалық, Ұлытау-Жезқазған күрежолдары әңгіме арқауы болды. Тіпті, әлеуметтік желі арқылы ауылдардан да сұрақтар түсіп жатты. Соның бірі «Қызылүй» бөлімшесінің тұрғындары ауыл іргесіндегі өзеннен өтетін көпірді жөндеу мәселесін көтерді. Қойылған сұрақтардың бәріне тұщымды әрі нақты жауап берілді. Көтерілген мәселелердің дені үстіміздегі жылы шешімін табатыны баса айтылды.

Қысқасы, жылышырайлы жүздесу бұқара мен билік арасындағы ымыраны, бірлесе еңбек ету бағытындағы ынтаны тағы бір мәрте айғақтап берді.

Ізтай БЕЛГІБАЙҰЛЫ