Қарағандылық педагогтер «ЖОО үздік оқытушысы — 2020» байқауының жеңімпаздары қатарына енді
Республикалық конкурстық комиссия отырысының қорытындысы бойынша Қарағанды техникалық университетінің сегіз оқытушысы және Бөкетов атындағы Қарағанды университетінің алты оқытушысы «ҚР ЖОО үздік оқытушысы-2020» атағына ие болды. Байқау жеңімпаздарына ғылыми-зерттеу жұмыстарын жүргізу және біліктілігін арттыру үшін әлемнің жетекші университеттерінде тағылымдамадан өтуге мүмкіндік берілді.
Айта кету керек, педагогтарға оқыту сапасы мен ғылыми-зерттеу қызметі бойынша баға берілді. Биыл алғаш рет субъективтілікті болдырмау үшін байқауға қатысуға өтінімдерді беру онлайн-режимде ҚР БҒМ ақпараттық жүйесі арқылы жүргізілді.
Ақтық кезеңде үміткерлердің жұмыстарын тексеру үшін республикалық сараптамалық комиссия құрылды, оның құрамына ҚР БҒМ Сыбайлас жемқорлыққа қарсы іс-қимыл жөніндегі Adal Bilim жобалық кеңсенің қызметкерлері, ғалымдар мен оқытушылар, оның ішінде өткен жылдардағы «Жоғары оқу орнының үздік оқытушысы» атағының иегерлері кірді.
Биыл байқауға Республиканың 73 жоғары оқу орнынан 623 үміткер қатысты. «ЖОО үздік оқытушысы — 2020» атағына еліміздің 48 ЖОО-нан 150 адам ие болды.
