Қарағандыда арнайы мектеп оқушылары арасындағы алғашқы облыстық онлайн-олимпиаданың қорытындысы шығарылды

Қарағандыда арнайы мектеп-интернаттардың 5-6 сынып оқушылары арасында алғаш рет облыстық олимпиада өтті. Олимпиада үш пән бойынша (қазақ және орыс тілдері, математика) ZOOM платформасында және Google form сервисінде онлайн-режимде өтті.

Олимпиаданың ұйымдастырушылары — Қарағанды облысының білім басқармасы және балаларға арналған «Сарыарқа дарыны» аймақтық ғылыми-тәжірибелік қосымша білім беру орталығы.

Зияткерлік жарысқа бес мектеп-интернаттан 34 оқушы қатысты. І, ІІ және ІІІ орындар 20 оқушыға берілді.

5 сынып оқушылары арасында І орынды тірек-қимыл аппараты бұзылған балаларға арналған Қарағанды облыстық мектеп-интернатының оқушысы Тұрар Шәмірбек алды. Сондай-ақ, арнайы оқу орындарының бесінші сынып оқушылары бес екінші және бес үшінші орындарды иеленді. 6-шы сыныптарға төрт екінші және бес үшінші орын берілді.  

Олимпиада жеңімпаздарын онлайн-марапаттау 27 қаңтарда өтеді. Оларға дипломдар мен сертификаттар, ал оқытушыларға алғыс хаттар беріледі.