Шабындықта қызу еңбек
Жаздың бір күні – қыстың бір айына азық. Мұны шаруа баққан ел жақсы біледі. Əсіресе мал өсіріп, оның өнімін ұқсатып отырған шаруа қожалықтарының иелері қазіргі қолайлы сəттерді тиімді пайдаланып қалуға тырысуда. Олар таң сəріден шабындыққа шығып, табиғаттың берген несібесін мейлінше шашау шығармай шауып алуға күш салуда.
Соңғы бірер жылдан бері Табиғат-Ана жаңбырдан таршылық көрсетіп жүргені мəлім. Жауын-шашынның аз болуынан шабындықтардағы шөптің шығымы да мардымсыз. Биыл да солай. Күздегі мол жауыннан кейін биыл шөп те мол шығар деп үміттенген едік. Олай болмады.
Десекте, жерден өнгенді жерде қалдырмауға тырысқан шөпшілер шабындықта қарқынды еңбек етіп жатыр. Мəселен, Борсеңгір ауылының малшылары биыл қысқа қажетті 17,8 мың тонна мал азығын дайындауды жоспарлап отыр. Қазіргі 5 шаруа қожалығы жəне өз жерлерін шабумен айналысып жатқан 12 жергілікті тұрғын осы үрдістен көріну мақсатында уақытпен санаспай еңбек етуде. Солардың қатарында Сарықамыс шаруашылығы лиманның шөбін толығымен шауып болды. Қазір олар шабылған шөптерін жайлауға кіріскен. Бүгінгі күні борсеңгірліктер шамамен 8000 тоннаға жуық шөп шауып отыр. Науқанға округ бойынша 16 трактор, 5 тырнауыш, 8 шалғы, 3 волокуша тартылған.
Аманкелді ауылында да шөп шабу науқаны ойдағыдай жүріп жатыр. Округ бойынша биыл 15323 тонна шөп əзірлеу жоспарланған екен. Бүгінгі күні жобамен 7660 тоннадай шөп шабылыпты. Жоспар елу пайызға орындалған. Қазір шабындықта 35 трактор жүр. Оның 17-сі шалғыда.
Ал, Қаракеңгір округі бойынша биыл 16161 тонна мал азығын дайындау жоспарланған. Осы жоспарды орындау үшін қазір округтегі шабынтықтарда 24 бригада жұмыс жасауда. Олар 64 техниканың күшімен 9620 тонна шөпті шауып үлгеріпті.
Шөп шабу науқаны Сарысу ауылдық округінде де қызу жүріп жатыр. Биылғы меже 18861 тонна. Округте 110 шаруа қожалығы тіркелген. Шабындықта 16 шаруа қожалығы шөп дайындау жұмысымен айналысуда. Мұның сыртында ауыл орталығында 62 үй мал ұстайды. Оларға 3000 тонна шөп қажет. Шөп шаруа қожалықтарының көмегімен түсіріледі. Бұл қалыптасқан дəстүр.
Қысқасы, аудан шаруашылықтарының қай-қайсында болмасын жасыл орақ науқаны ойдағыдай өтуде. Тек, қай оңірде болмасын шөптің түсімі бұрынғы жылдан төмен.
Ізбасар ОЙБАС.
