Әлихан Смайылов Премьер-Министр болып тағайындалды
Мемлекет басшысы да Премьер-Министр лауазымына Әлихан Смайыловты ұсынды. Мәжіліс депутаттарының басым даусын иленген Әлихан Смайылов лауазымды қызметке қайта тағайындалды.
«Мен сайлауда жеңіске жеткен партия Мемлекет басшысына Премьер-Министрдің кандидатурасын ұсына алатынын атап өттім.
Бүгін мен Мәжіліс төрағасы Ерлан Жақанұлы Қошановты қабылдадым. Жаңа ғана фракция жетекшілерімен арнайы кездестім. Үкімет басшысы лауазымына «Amanat» партиясы ұсынған кандидатты талқыладық. Ортақ мәмілеге келдік.
Ата заңымыздың 44-бабына сәйкес, Премьер-Министр лауазымына Әлихан Асханұлы Смайыловтың кандидатурасын ұсынамын.
Баршаңыз бұл азаматты жақсы танисыздар. Білікті әрі тәжірибелі маман. Жұмысқа адал, еңбекқор адам. Ол үкіметтің алдында тұрған міндеттерді жақсы біледі. Оған жаңа Үкіметтің тізгінін сеніп тапсыруға болады деп санаймын.
Конституцияның 56-бабына сәйкес Премьер-Министр лауазымына Әлихан Асханұлы Смайыловты тағайындау үшін Мәжілістің келісім беруін сұраймын», — дейді Қасым-Жомарт Тоқаев.
Мәжілістің жалпы отырысында Әлихан Смайыловтың кандидатурасы депутаттар тарапынан бірауыздан қолдау тапты.
