Жастар – ел дамуының қозғаушы күші
Аудандық Мәдениет және тілдерді дамыту бөлімінің ғимараты алдында Халықаралық жастар күніне арналған “Ұлттық рух – жастар болашағы” атты мерекелік шара өтті. Кешке жергілікті жас өнерпаздар, спортшылар, белсенді жастар және ауыл қонақтары жиналды. Қазақы нақышта ұлттық оюлы дастархан жайылды. Қымыз құйылған тостақандар дастарқан мәзірін келтіріп, кеш қоңыр домбыра үнімен әрленді. Ұлттық киім киген жүргізушілер Жолдасбек Рашит пен Тоғжан Мейрамбек «Сарыарқа» күйінің әуенімен қонақтарды қарсы алды. Сөз басында жүргізушілер жастардың қоғамдағы рөлін және ұлттық құндылықты сақтау маңыздылығын атап өтті.
Алғашқы сөз Ұлытау ауданының ішкі саясат бөлімінің басшысы Азамат Кареновке берілді. Өз кезегінде Азамат Ермағанбетұлы белсенді жастар – Елдара Обайдуллина мен Ақбота Русланқызын, Арай Мыңбаева мен Наркез Зейнұрқызын Алғыс хатпен марапаттады.
Ауылдың жас көшбасшысы ретінде Ақбота Русланқызы жастарға жүрекжарды лебізін арнады.
«Біз – Ұлытаудай киелі мекенде туған, рухы биік, тарихы терең елдің ұрпағымыз. Сол туған жерімнің қасиетін ардақтап, оның бай тарихын насихаттаудың арқасында ЕҰУ-да Камал Смайылов атындағы арнайы стипендия иегері атандым. Бұл – мен үшін үлкен мәртебе, туған жердің атын асқақтату жолындағы белсенділігімнің бағалануы» – деді ол өз сөзінде.
Бұдан кейін Жаңагүл Кенжебай “Адай” күйін орындап, Нұржан Суюмбаев “Аппақ баламын” әнін шырқады. «Жасыл ел» еңбек жасағының сарбазы Айша Төлеу де ізгі тілегін білдірді.
Жалпы айтқанда, сол күнгі іс-шарада көрермендер өз пікірлерін білдіріп, мерекелік шараның жоғары деңгейде өткенін атап өтті. Оған көрермен қауымның пікірі дәлел.
– «Ұлытаудың жастары нағыз дарынды, әрі ұйымшыл екеніне тағы бір көзіміз жетті. Осындай рухты кештер жиі өтсе екен», – деді ауылымыздың тұрғыны Нұртөре.
Келесі кезекте өнерлі жұп Нұржан мен Мадина “Алтыным” әнін, Елдара “Жібек сезім”әнін орындап, көрерменді ән бесігінде тербелтті.
Шара барысында қонақтарға тегін фуршет ұсынылды, сондай-ақ 2023 жылғы аудан әкімінің жастарды қолдауға арналған грантының иегері Наркез Алдаберген табиғи сүт өнімдерінен жасалған экологиялық таза өнімдерді қолжетімді бағада сатылымға шығарды. Жас өнерпаздар Айғаным Данабек пен Кәусар Жомарт “Отаным – Қазақстан” әнін орындаса, ал Нұрлан Мусабеков пен Нұржан Суюмбаев “Ұлытауым” әнін нақышына келтіре шырқап, мерекелік кештің шымылдығын жапты.
Бұл күн – тек мереке емес, ұрпақтар сабақтастығын, ұлттық рух пен жас буынның жалынды жігерін айқын көрсеткен ерекше кеш ретінде есте қалды. Ұлттық рух пен жастардың мерекесі осылайша, көрерменге тамаша әсер сыйлады.
Ақбота ЕСЕНҚАБЫЛ.
