Медициналық нысандар саны артады
Биыл Ұлытау облысында 27 медициналық нысанның ашылуы жоспарлануда. Оның 12-сі фельдшерлік-акушерлік пункт пен 12 медициналық пункттің құрылысы, Ұлытау ауданындағы аурухана мен емхана мен Сәтбаев қаласындағы травматологиялық пункттің құрылысы, Жезқазғандағы инсульт орталығын жабдықтау.
2023 жылы облыс бойынша 10 фельдшерлік-акушерлік пункт құрылыс жұмыстары жүргізілді. Оның ішінде 5 ФАП «Ауылдық денсаулық сақтауды жаңғырту» пилоттық ұлттық жобасы шеңберінде болса, 1-еуі жеке инвестор есебінен, 4 ФАП «Ауыл – ел бесігі» бағдарламасы бойынша басталды.
Жоғарыда көрсетілген 4 ФАП Ұлытау ауданында (Байқоңыр, Терісаққан, Мибұлақ, Қоскөл) басталып, мердігер «Altyn LTD» ЖШС тарапынан құрылысқа сапасыз материалдарды қолданылғаны анықталды, осыған байланысты құрылыс монтаж жұмыстары уақтылы орындалмай, келісімшарт бұзылды. Қазіргі таңда, мердігерді жосықсыз деп тану туралы сот жүргізілуде. Ұлытау облысының әкімі Берік Әбдіғалиұлы қалған жұмыс көлемін аяқтау үшін конкурс жариялап, нысанды мамырдың соңына дейін аяқтауды тапсырды.
Облыс басшысы сондай-ақ салынып жатқан денсаулық сақтау нысандарының басты мақсаты – халыққа қызмет көрсету екенін жеткізді.
«Ол үшін бірінші кезекте дәрігер тапшылығы мәселесін шешуді тапсырамын. Бұл мақсатта тиісті қаржы да бөлінген. Құрылысы аяқталып, толық жабдықталған ғимаратты алдымен сапалы, жоғары санатты кадрлармен қамтамасыз ету қажет» – деді Ұлытау облысының әкімі өз сөзінде.
