Жиһанкез Жаңақорғанға жетті
Өткен аптаның соңында Сәрсенбай Оспанұлы Сыр бойында болып, ондағы қалың қазақпен қауышқан еді. Қызылорда қаласы тарихи-өлкетану музейінің көрме ғимаратында жиһанкез қариямен кездесу де өтті. Оған Қорқыт ата университетінің студенттері, БАҚ өкілдері, ауыл өнерпаздары, музей қызметкерлері қатысты.
Іс-шара барысында Ұлытаудың тарихи ескерткіштері мен ерекше табиғатының фотолары бейнеленген «Ұлытау» фотокөрмесі көрермен назарына ұсынылды. Оның соңы мерекеге ұласып, қала өнерпаздары өнер көрсетіп, ағамызға жақсы көңіл күй сыйлады. Облыс әкімінің кеңесшісі Ержан Уәиісов ақсақал жиhанкез ағамызға жылы лебізін білдіріп, жолына сәттілік тіледі. Облыс әкімінің атынан Алғыс хат та табыс етілді.
15 сәуір күні таңертең Сәрсенбай Қотырашов Қызылорда қаласынан Түркістанға қарай жол жүрді. Сол күні 40 шақырымды артқа тастаған жиһанкез, Сұлутөбе ауылына қонды. Ал, 17 сәуір күні түс ауа Шиеліге жетті. Ақсақалды әр ауылдың азаматтары барынша құрметтеп, арнайы күтіп алып, дәм ұсынып, қондырып, қолдап жатыр
– 19 сәуір күні Сәрсенбай аға Жаңақорған ауданына келіп тоқтады. Онда қолөнершілердің тізімін жинау, толықтыру мақсатында қолөнерші, суретші Үмбет Абибуллаев ақсақалға жолығып, үйінде қонақ болып, қолынан шыққан еңбектерімен танысты. Шебер 50-ден астам шәкірт тәрбиелеген екен. Осылайша, оңтүстік өңірге жеткен Сәрсенбай Оспанұлы өзінің сапарға шыққандағы мақсатын орындауға кірісті, – дейді жиһанкездің қолдаушысы һәм күнделігін жүргізуші Баян Шайгөзова.
Ізтай Белгібайұлы
