Жемқорлық – індет, жою – міндет

Қазіргі кезде сыбайлас жемқорлық əлемнің кез келген елінде оның саяси дамуына байланыссыз, оның ішінде Қазақстанда да, əлеуметтік құбылыс ретінде өмірін жалғастырып келеді, ол тек ауқымдылығымен ғана ерекшеленеді. Сыбайлас жемқорлық əлеуметтік-экономикалық даму үдерісін, нарықтық экономиканың құрылуын, инвестициялар тарту процесін тежейді.

Демократиялық мемлекеттің саяси жəне қоғамдық институттарына кері əсерін тигізеді, елдің болашақ дамуына елеулі қауіп төндіреді. Қазақстанның мемлекеттік саясатының негізгі басымдықтарының бірі сыбайлас жемқорлықпен күрес болып табылады. Сыбайлас жемқорлықтың жиі бой көрсететін, ең қауіпті түрі – парақорлық. Бірінші кезекте пара берудің себептерін, пара алудың жағдайларын түп тамырын жою үшін қоғам болып белсенділік танытуымыз қажет. Яғни пара беру де, пара алу да пайдалы болмайтындай, үлкен қылмыс ретінде саналатындай жағдай, қоғамдық сана ретінде қалыптасуы қажет. Парақорлық мемлекеттік аппараттың қалыпты қызмет етуіне бөгет болып, билік жəне басқару органдарының беделіне нұқсан келтіреді, заңдылық қағидаларын жоққа шығарып, азаматтардың конституциялық құқықтары мен заңды мүдделеріне қысымшылық жасайды. Парақорлықтың алдын алу, жолын кесу, ашу жəне тергеу жұмыстары жоспарлы түрде жүзеге асырылып келеді. Бүгінгі таңда əлеуметтік аурудың алдын алу жəне əшкерелеу үрдісі жылдан жылға өсе түсуде.
Біздің қоғамда сыбайлас жемқорлыққа орын жоқ. Қоғамның барлық күш-жігерін біріктіріп, осы дерттің одан əрі ушықпауы үшін оны тоқтатудың барлық амалдарын қолдану арқылы ғана бұл құбылысқа тиімді түрде қарсы тұруға болады. Сыбайлас жемқорлыққа қарсы оның алдын алу шараларын күшейту мақсатында «Қазақстан Республикасының Мемлекеттік қызметі туралы», «Сыбайлас жемқорлыққа қарсы іс-қимыл туралы», «Мемлекеттік көрсетілетін қызметтер туралы» Заңдарына мемлекеттік қызметшілердің жауапкершілігін арттыру, жемқорлықтың туындауына ықпал ететін факторларды азайту, қағазбастылықты жою мақсатында бірталай өзгерістер енгізілді.
Сондықтан сыбайлас жемқорлықпен күресу барлық Қазақстан Республикасы азаматтарының азаматтық борышы деп білу керек.

Мереке НҰРМАҒАНБЕТОВА,
«ҚР АШМ Ветеринариялық бақылау жəне қадағалау комитетінің Ұлытау аудандық аумақтық инспекциясы» ММ басшысы.