Жасанды интеллект, бірыңғай дизайн-код және мұғалім мәртебесі
Жаңа оқу жылы да келіп жетті. Алдағы аптада еліміздің барлық мектептерінде алғашқы қоңырау соғылып, сыныптарда биылғы жылдың бірінші дәрісі де басталады. Осы орайда біз жаңа оқу жылында оқушылар мен ата-аналарды қандай жаңалықтар күтіп тұрғанын саралап көрген едік.
ҚР Оқу-ағарту министрі Ғани Бейсембаевтың айтуынша 2025–2026 оқу жылында бірқатар жаңалықтар енгізілген екен. Соның бастыларына тоқтала кетейік.
Мұғалім мәртебесі –
басты назарда
Министр өз сөзінде педагогтарды қызметіне жатпайтын міндеттерден босату, сондай-ақ орынсыз айыптаулардан қорғау мәселесіне ерекше тоқталды. «Мұғалімді қорғау арқылы біз балалардың сапалы білім алу құқығын қорғаймыз», – деді ол.
Жасанды интеллект –
оқу үдерісінде
Жаңа оқу жылынан бастап «Цифрлық сауаттылық» және «Информатика» пәндеріне жасанды интеллект элементтері енгізіледі. Орта білім беру жүйесінде AI қолданудың этикалық стандарттары қабылданды. Сонымен бірге оқушылар үшін Day of AI онлайн-курстары, ал педагогтер үшін арнайы біліктілікті арттыру бағдарламалары әзірленді. Бұдан бөлек, кезең-кезеңімен AI-Kitap білім беру платформасы енгізілмек.
Ата-аналармен жаңа
форматтағы жұмыс
Қараша айында ата-аналар комитеттерінің алғашқы республикалық форумы өтеді. Бұл алаң «мектеп – ата-ана – қоғам» ынтымақтастығын нығайтуға бағытталады.
Бірыңғай дизайн-код
Жаңа оқу жылынан бастап мектептердің ішкі безендірілуі біріздендіріледі. Қазірдің өзінде 100-ден астам жаңа «Келешек мектептері» бекітілген брендбук негізінде салынып жатыр. Алдағы уақытта бұл стиль 1 300 мектептің жөндеу жұмыстары барысында қолданылып, болашақта елдегі барлық білім ұйымдарын қамтитын болады.
Аманкелді АҚШАЛ.
