Жас жезқазғандықтар өз ісін ашуды жалғастыруда
Жезқазғанда жас кәсіпкерлер саны артып келеді. Өткен жылы қала әкімінің гранттарына 26 үміткер өз жобаларын ұсынды, олардың ішінде жеті әлеуметтік маңызы бар кандидат іріктелді. Бизнес-идеяларды жүзеге асыру үшін 5,5 млн теңге бөлінді. Биыл жезқазғандықтар өз кәсібін ашуға және дамытуға 8,5 млн теңге алады.
Жезқазған басшысының 500 мың теңге грантын Сұлушаш Еркінова алды. Ол «Мастер уборки» жобасын қорғады.
– Біздің қаламызда клинингтік компаниялар өте аз, сондықтан күйеуіммен бірге осы іспен айналысуды шештім. Грантқа қажетті құрал-жабдықтар сатып алдық. Қазір бізде тапсырыс көп. Біз жұмсақ жиһаздар мен кілемдерді жуамыз. Жақында біз автомобильдің ішін жууға және тазалауға арналған аппарат алдық. Бізде терезелерді жууға арналған құрылғы бар. Өз бизнесімізді кеңейтуді қалаймыз, – деді Сұлушаш.
Гранттың тағы бір иегері, бір миллион теңгеге ие болған Жәния Бердіханова Saumal Center ашты. Кеңгір ауылының тұрғыны жылқылар жайлы көп біледі және 13 жасында бие саууды бастаған.
– Бізде тек Кеңгір ауылында ғана емес, Жезқазған мен Сәтбаев қалаларында да сауда нүктелері жұмыс істейді. Басқа қалаларда да клиенттеріміз бар. Пандемия кезінде қымыз бен жаңа сауылған бие сүтіне деген сұраныс артты. Мен осы бағытта дамуым керек деп шештім. Қала әкімінің гранты ісімді өрге дөңгелетуге көмектесті, – деп атап өтті Жәния.
«Жезқазған әкімінің грантына үміткер жобалардың саны жыл сайын артып келеді. Мысалы, 2019 жылы 15 өтінім келіп түссе, 2020 жылы олардың саны 26-ға жетті. Сондай-ақ, гранттар саны да артып келеді. Биыл әкімнің грантына 8,5 миллион теңге бөлінді», – деп хабарлады Жезқазған жастар ресурстық орталығы.
