Жақия Садықұлы САДЫҚОВ
Ұлытау өңірінің дамуына сүбелі үлес қосқан тұлға, абыз ақсақал, Ұлытау ауданының Құрметті азаматы, Ұлытау аудандық Қоғамдық кеңесінің төрағасы, Жақия Садықұлы Садықов фәни-жалғаннан бақи-дүниеге озды.
Жақия Садықұлы 1942 жылы, 3 қаңтарда Қарағанды облысы, Ұлытау ауданы, Қаракеңгір ауылында дүниеге келген.
№1 Ұлытау орта мектебінде оқып, білім алғаннан кейін еңбек жолын 1958 жылы Шеңбер кеншарында автомобиль жүргізушісі болып бастаған.
1965-1974 жылдары Аманкелді атындағы кеңшарда автомеханик, кеңшар комсомол комитетінің хатшысы, автогараж меңгерушісі болып қызмет атқарған.
Қоғамдық жұмыстарға белсене араласып, кеңшардың Халық театры атағын жеңіп алуына үлес қосқан алғашқы ұйымдастырушылардың бірі. Театр сахнасында Ш.Аймановтың «Жәмила», М.Әуезовтың «Еңлік- Кебек» және тағы басқа да көптеген спектакльдерде ойнап, түрлі кейіпкердің образын сомдаған.
1974-1977 жылдары – Қазақстан Компартиясы Ұлытау аудандық комитеті ұйымдастыру бөлімінің нұсқаушысы, кейін Сарыкенгір кеншарында партком хатшысы.
1980-1995 жылдары – Ұлытау ауданында дербес ауылшаруашылық техникасы (Сельхозтехника) кәсіпорынының директоры.
1993-1997 жылдары – аудан әкімінің орынбасары, аудан әкімі аппаратының жетекшісі.
1997-2000 жылдары – аудандық мәдениет бөлімінің меңгерушісі.
2000-2007 жылдары Ұлытау ауылдық округінің әкімі қызметін атқарған.
Кішітау, Кеңгір ауылдық, Ұлытау аудандық кеңестерінің бірнеше мәрте депутаты болып сайланған.
Қазақстан ЛКСМ Орталық Комитетінің Құрмет грамотасымен, БЛКЖО «Алтын дән» белгісімен (1967 жыл) марапатталған.
«Еңбектегі ерлігі үшін» (1970 жыл), «Еңбек ардагері» медальдарымен (1986 жыл), Жезқазған облыстық кеңесінің грамотасымен (1990 жыл), Қарағанды облысы әкімінің Құрмет грамотасымен (2002 жыл) марапатталған.
Ұлытау ауданының Құрметті азаматы (2002 жыл).
Қазақстан Республикасы Тәуелсіздігінің 10 жылдық құрметіне ҚР Президентінің Алғыс хаты (2001 жыл) мен Алғысын (2005 жыл) алған.
Қарағанды облыс әкімінің қаулысымен (2003 жыл) үздік әкім ретінде танылып, Құрмет грамотасымен марапатталған.
Қазақстан Республикасы Президентінің Жарлығымен мемлекеттік қызметті ұзақ жылдар мінсіз атқарғаны үшін ҚР Құрмет грамотасымен (2012 жыл) марапатталған.
Соңғы деміне дейін Ұлытау аудандық Қоғамдық кеңесінің төрағасы қызметін атқарды.
Зейнет демалысына шыққаннан кейін де қоғамдық жұмыстан қол үзбей, тынымсыз ізденіс үстінде жүрген ардақты ақсақалымыз қатарластары мен өзінен кейінгі буынға адалдық, еңбекқорлық қасиеттерімен үлгі бола білді. Жақия ақсақалдың Ұлт ұясы – Ұлытаудың өркендеуіне, әлеуметтік-мәдени тұрғыда дамуына өлшеусіз үлес қосты. Шыншыл әрі қарапайым болмысының арқасында өңір жұртшылығы алдында үлкен бедел мен адами абыройға бөленді.
Марқұмның отбасымен туыс-туғандарына қайғыларына ортақтаса отырып, көңіл айтамыз.
Ұлытаудың ардақты ардагері, қадірлі ақсақалының есімі мен бейнесі біздің жүрегімізде мәңгі сақталады.
С.Медебаев, А.Мырзабеков, М.Оспанов, Ж.Бегаев, А.Қайырбек, Е.Дәуітбаев, Ә.Жандарбеков, Ш.Үмбетов, Қ.Бекілдеков, С.Бектемісов, Е.Әбжамалов, Ж.Әшенов, М.Мәткенов, А.Құрмансейітов.
