Жұмысшы мамандықтар – елдің тірегі, болашақтың кепілі

2025 жыл елімізде «Жұмысшы мамандықтар жылы» деп жариялануы – еңбек адамының мәртебесін көтеруге бағытталған тарихи қадам. Бұл бастама – қарапайым еңбектің қадірін қайта жаңғыртып, жұмысшы кәсібін таңдаған азаматтарға құрмет көрсетуге арналған.

Бүгінде еліміздің экономикасы мен өндіріс саласының тұрақты дамуы білікті жұмысшылардың еңбегіне тікелей байланысты. Құрылысшылар қала салып, электриктер жарық жеткізіп, дәнекерлеушілер өндіріс дөңгелегін айналдырып, механиктер техниканы іске қосып отыр. Олар – көрінбей істейтін, бірақ күнделікті өміріміздің негізін ұстап тұрған жандар.

Жұмысшы мамандықтар жылында кәсіптік-техникалық білім беру жүйесін жетілдіру, заманауи құрал-жабдықтармен жабдықталған оқу орталықтарын ашу, жастарды еңбекке баулу – басты мақсаттардың бірі. Себебі технология дамыған сайын шебер, іскер, жауапты мамандардың қажеттілігі арта түсуде.

Еңбек адамына құрмет – бұл тек сөз жүзінде емес, іс жүзінде қолдау көрсету. Жалақыны әділ белгілеу, қауіпсіз еңбек жағдайын жасау, кәсіби біліктілікті арттыруға мүмкіндік беру – еліміздің дамуына салынған ең мықты инвестиция.

Жұмысшы мамандықтардың беделін арттыру – болашағымызды нығайту. Ендеше, еңбек адамына деген құрметті арттырып, ұрпаққа үлгі болатын дәстүрді қалыптастыру – баршамыздың парызымыз.

Алмат БЕГАЕВ,
кәсіпкер.