Ырыс басы – нан

Ауданымызда шағын жəне орта бизнес қарыштап дами бастады. Əсіресе, жеке кəсіппен айналысуға бет бұрып, тəуекелге бел буған жастар қатары жыл санап арта түсуде. Солардың бірі, ұлытаулық кəсіпкер Қаламқас ƏБДІҚАРОВА.

Ол өткен жылы шағын жəне орта бизнесті дамытуға жəне жас кəсіпкерлерді қолдауға бағытталған облыс əкімінің грантына қол жеткізіп 1 млн. 500 мың теңгені жеңіп алған жеңімпаз. Сол қаржыға биылғы жылдың мамыр айында қажетті нан пісіретін қондырғыларды сатып алып, аудан орталығынан жаңа наубайхана ашқан болатын. Кəсіпкердің бұл бастамасын ауыл жұртшылығы да қолдап, оның жұмысына сəттілік тілеген еді.

Бүгінде Қаламқастың есімі аудан жұртшылығына кəсіпкер ретінде жақсы таныс. Ол өз кəсібін ұршықша иіріп, еңбегінің нəпақасын көріп отырған кəсіпкер. Онымен қоса, ауыл халқының алғысына бөленіп отырған жан. Оған тұрғындардың ықылас білдіретін реті де бар. Өйткені, бұған дейін нан өнімдері Жезқазған-Сəтбаев қалаларынан тасымалданатын, оның өзі күн сайын емес аптасына үш-ақ рет əкелінетін еді. Сенбі, жексенбі күндері дүкен сөрелерінде нан болмайтын. Тұрғындар нан таба алмай сергелдеңге түсетін.
Ал, қазір ше? Қай сауда орнына барсаң да дүкен сөрелерінде ыстық бөлкелердің иісі аңқып, самсап тұрғаны. Бұл əрине, Қаламқастың өз кəсібін жетік меңгеруімен қатар толассыз еңбектенуінің нəтижесі. Қазіргі күні Қаламқас Махмұтқызының наубайханасынан күн сайын бірінші сортты «Цесна» ұнынан 700 бөлке пісіріліп дайындалуда. Əр бөлкенің салмағы 600 грамм тартады. Бөлкенің құны – 160 теңгеден халыққа қолжетімді бағамен сатылуда.

Кəсіпкердің айтуынша, наубайхананың іші жаңа құрылғылары мен нан өнімдерін өндірудің барлық технологияық процессі заманауи стандартқа сай сəйкестендіріліпті. Күнделікті 12 сауда нүктелеріне жаңа піскен бөлкелерді өздері көліктерімен жеткізеді екен.
Осындай көптің көңілінен шыққан кəсіпкерге тұтынушылар да дəн риза. Біз де өз тарапымыздан Қаламқас Махмұтқызының еңбегіне табыс тіледік!

Қайрат ЖҰМАБАЙ.