Таза ел – таза болашақтың кепілі

«Таза Қазақстан» акциясы – табиғатқа жанашырлықпен қараудың нақты қадамы. Бұл шараның басты мәні – бір күндік тазалық емес, адамдардың ой санасын өзгерту. Егер біз бүгін далаға тасталған бір ғана бөтелкені көтеріп қоқыс жәшігіне салсақ, ертең балаларымыз сол әрекетті қайталайды. Осылайша ұрпаққа экологиялық мәдениет сіңеді.

Акция кезінде елдің түкпір-түкпірінде мыңдаған адам бірігіп, туған жерін таза ұстауға үлес қосады. Бұл – бірлік пен ұйымшылдықтың белгісі. Таза орта – тек әдемілік үшін емес, денсаулық үшін де аса қажет. Себебі ластанған ауа, қоқысқа толы жер – адамның өмір сапасын төмендетеді.

«Таза Қазақстан» – табиғатты қорғауға шақыратын үндеу. Әркім өз отбасынан, өз үйінен бастап тазалыққа мән берсе, бүкіл елдің бейнесі өзгереді. Бүгінгі кішкентай іс – ертеңгі үлкен нәтиже. Сондықтан бұл акцияға қатысу – тек табиғатқа емес, болашаққа жасалған қамқорлық деп түсіну керек.

Маржан БУЛЕГЕНОВА,
көпбалалы ана.