Түлектерді алда сынақ күтіп тұр

Енді бірер күннен соң аудандағы барлық мектептерде кезекті оқу жылы аяқталып, тағы бір толқын алтын ұя мектептерінен түлеп ұшпақ. Біз аудандық білім бөліміне қоңырау шалып, қанша баланың мектеп бітіргелі тұрғанын жəне оларды алда қандай сынақтардан өтетінін сұрап білген едік.

Аудандық білім бөлімі берген ақпаратқа қарағанда Ұлт ұясы – Ұлытау ауданындағы 13 мектепті биыл 90 бала бітірмек. Олардың қатарында №1 Ұлытау тірек мектебінің бір оқушысы «Алтын белгі» төсбелгісін алады деп күтілуде. Ал, «Үздік аттестатқа» үміткерлер саны 11 оқушы.

Биыл мектеп бітіретін 90 түлектің 85-і ҰБТ тапсыруға өтініш беріпті.

Орайы келгенде айта кетейік, биылғы оқу жылы əдеттегідей 25 мамырда аяқталады. Бұдан əрі оқушыларды қорытынды аттестациялау жүргізіледі. Оның мерзімдері де ҚР Білім жəне ғылым министрлігінің бұйрығымен бекітілді. Атап айтар болсақ, 9 (10) сынып білім алушыларының қорытынды бітіру емтихандары – 2022 жылғы 28 мамыр – 6 маусым аралығы; 11 (12) сынып білім алушыларының мемлекеттік бітіру емтихандары – 2022 жылғы 27 мамыр – 10 маусым аралығы болып белгіленді.

9 (10) сынып білім алушылары үшін санитарлық талаптарды сақтай отырып: қазақ/орыс тілі (оқыту тілі) бойынша эссе нысанында жазбаша емтихан, гуманитарлық цикл пəндерін тереңдетіп оқытатын мектептер үшін — жазбаша жұмыс (мақала, əңгіме, эссе), математика (алгебра) бойынша жазбаша емти хан (бақылау жұмысы), орыс тілдерінде оқытатын сыныптардағы қазақ тілі мен əдебиеті бойынша жазбаша емтихан (мəтінмен жұмыс, мəтін бойынша тапсырмаларды орындау) жəне қазақ тілінде оқытатын сыныптардағы орыс тілі мен əдебиеті бойынша жазбаша емтихан (мəтінмен жұмыс, мəтін бойынша тапсырмаларды орындау), таңдау пəні (Физика, Химия, Биология, География, Геометрия, Қазақстан тарихы, Дүниежүзі тарихы, Əдебиет (оқыту тілі бойынша), Шет тілі (ағылшын/француз/неміс), Информатика) бойынша жазбаша емтихан тапсырады

Ал, 11 (12) сынып білім алушылары үшін санитарлық талаптарды сақтай отырып: алгебра жəне анализ бастамаларынан жазбаша емтихан, қазақ/ орыс тілі (оқыту тілі) бойынша жазбаша емтихан, Қазақстан тарихынан ауызша емтихан, орыс тілдерінде оқытатын мектептерде/сыныптарда қазақ тілі жəне əдебиетінен жəне қазақ тілінде оқытатын мектептерде/сыныптарда орыс тілі жəне əдебиетінен жазбаша емтихан, таңдау пəні (Физика, Химия, Биология, География, Геометрия, Дүниежүзі тарихы, Құқық негіздері, Əдебиет, Шет тілі (ағылшын/ француз/неміс), Информатика) бойынша жазбаша емтихан тапсырады.

Ізтай БЕЛГІБАЙҰЛЫ