Түйткілдер түйіні тарқатылады

Борсеңгір ауылындағы сапарын аудан әкімі Советбек МЕДЕБАЕВ білім ошағын аралаудан бастады. Мектептегі пән кабинеттері бүгінгі күн сұранысына толық сай келетін жауап қондырғылармен қамтамасыз етілген. Мектеп оқу жылын табысты аяқтады. Алдағы уақытта оған күрделі жөндеу жұмысын жүргізу жоспарланған.

Білім және тәрбие ошағынан кейін аудан басшысы жергілікті емханаға атбасын бұрып, медицина мекемесінің бүгінгі жұмыс барысын бағамдады. Дәрігерлерге карантиндік шектеу талаптарын сақтай отырып, тұрғындарды вакцина салу жұмыстарын одан әрі ширатуды тапсырды.

Келесі кезекті «Жұмыспен қамту жол картасы — 2020» бағдарламасы аясында күрделі жөндеуден өткен клубтың жай-күйімен танысып, мәдениет ордасында жергілікті тұрғындармен кездесті. Жүздесу кезінде Советбек Тұрсынұлы ауылдағы электр жарығы мен ауызсу мәселелеріндегі түйткілдерді тарқату жолдарын атап өтті. Ауылдық округ орталығы көшелерінің көлік жолдарына «Ауыл ел – бесігі» бағдарламасы шеңберінде асфальт төселмекші. Кездесу барысында тұрғындар өздерін толғандыратын сауалдарды бүкпесіз қозғады. Аудан әкімі туындаған сауалдардың бәріне орнықты жауап берді.

Жасұлан АЯШЕВ