Ұстаздар ұлықталған күн

Ел Тәуелсіздігінің 30 жылдығы аясында ұйымдастырылған Мұғалім күні мерекесі ауданда ерекше сипатта атап өтілді. Бұл жолғы жүрекжарды лебіздер білім беру саласының қызметкерлеріне арналып, ауданның бір топ ұстазы құрмет биігінен көрінді.

Жиында алғашқы сөзді алған аудандық білім бөлімінің басшысы Бағдат Әбдірайымов мұғалімдерді мерекесімен құттықтап, пандемия кезіндегі еңбектерін айрықша атап өтті.

– Сіздер әлемді жайлаған қауіпті індет кезінде «бір жағадан бас, бір жеңнен қол» шығарып жас ұрпаққа сапалы да мәнді білім беру жолында аянбай еңбек еттіңіздер. Сол еңбектеріңізді жоғары бағалаймын. Әрине, бұрыннан білім беру саласының негізгі алтын арқауы, асыл діңгегі ұстаз болған. Бүгінде елімізде мұғалімдер қауымына ерекше көңіл бөлініп келеді. Жыл сайын ұстаздар жалақысы еселеп өсуде. Өйткені, мұғалімдердің еңбектері болашаққа бағытталған. Ал, бүгінгі берілетін марапат – сіздердің еселі еңбектеріңіздің жетістігі, — деді Бағдат Қабденұлы.

Бұдан соң, аудандық білім бөлімінің басшысы ұрпақ тәрбиелеу ісіне елеулі еңбек сіңірген аудан мұғалімдерінің еңбегін еледі. Бірінші кезекте ардагер ұстаз Тынымкүл Ахметованың кеудесіне «Ы.Алтынсарин» атындағы төсбелгіні тақты. Осы жиында мектеп директорлығынан ауыл әкімі лауазымына сайланған Шәріп Бекетов пен Сағындық Дәндібаевқа аудандық білім бөлімінің Алғыс хаты тапсырылды. Одан кейінде марапаттау рәсімі жалғасып, ҚР Білім және ғылым министрлігінің Құрмет грамотасымен Әмірхан Алпысбаев, Қанат Әубәкіров, Ермек Жүнісов ма рапатталды. Министрліктің Алғыс хатынаЖанна Мырзабекова, Гүлшат Жалбырова, Дәулет Әбдірахманов ие болды. Бұдан бөлек, Қарағанды облысы әкімінің Құрмет грамотасымен Балгүл Бейсембаева, Сәбиғазы Жылқыбаев марапатталды. Облыс әкімінің Алғыс хаты Манарбек Бейсеновке берілді. Ал, Қарағанды облысы білім басқармасының Құрмет грамотасымен Назгүл Орынбаева, Гүлдана Бейсенова, Айгүл Көшенова марапатталды. Облыстық білім басқармасының Алғыс хатын Сәуле Күтеева мен Нұргүл Омарова алды. Педагогикалық шеберлік орталығының Алғыс хаты Ерлан Малдыбаевқа табысталды. Аудан әкімінің Құрмет грамотасымен Батырхан Базылбеков марапатталып,Мөлдір Әбжанова Алғыс хатына ие болды.

Бұл марапаттарды аудандық білім бөлімінің басшысы Бағдат Әбдірайымов, аталған мекеменің кәсіподақ ұйымы атынан Қайыржан Біраяқов табыс етті.

Мұғалімдер мерекесіне арналған салтанат аудандық Өнер мектебі шәкірттерінің әсем әнімен, ырғақты биімен әспеттеліп отырылды.

Қайрат ЖҰМАБАЙ